Fake Message chu chanchin diklo leh belhchian dawllo tihna a ni.  Video siamdanglam(edited),  finfiah loh (unverified) news & advertisements bakah h thu diklo thehdarhtu nitin sang tel an awm a. India ramah ringawt pawh Fake news hi a tam hle. Kum 2018 ah ringawt pawh khan fake news vangin buaina lian tak a chhuaka mi 20 lai in nunna an chan anih kha. Mizoramah pawh pawisa lama inbumna te, mimal intihhmingchhiatna te leh mipui min ti buai thei thu leng vak atam thin hle. 

Hetiang thu lo chhiar a awih mai thin leh chhiar chiang lo a hmuh rual ruala group danga forward nghal mai kan awm thin bawk. Mipui nunphung tikhaihlak leh timangmang thei a tam hle.  Prime Minister Narendra Modi pawhin 7 March 2020 khan Social media kaltlanga thu leng vak nazawng awih lo turin mipui te min ngen hial anih kha. Social media a thu dik tawklo thehdarh tam lutuk avangin Assembly Bugget session ah hial pawh sawilan a ni. Kan fimkhur tlan theih beiseiin Message / Website diklo leh lem kan hriat theih dan langsar zual han tarlang ila:

1. Thil danglam bik lutuk, Entirnan: Thil man tlawm lutuk te, Lucky ticket a pawisa tam tak dawn anga lang te, a thlawn a dawn theih thil ang chi leh leh chhiat that thil thleng kaihhnawih a thil maksak deuh deuh ang chi te hi fake massege a ni thin.

2. Website click tur ang chi ah hian Web Address (URL) a https inziak a "s" tello http tih ringawt te, domain man maksak tak tak ang chi te hi a lem a ni thin. Thulakna(Source) awmlo emaw, mumal lo tak ang chi te hi a lem a ni thin bawk.

3. Website rintlak leh pangngaiah chuan “Contact Us,” “About Us,” and “Privacy Policy.” mumal tak a awm thin. Website lemah chuan a awmlo thin. A awm anih pawhin biak pawh theih tak tak an ni ngailo.

4. A bik takin hunpui (Festival) ang chi ah hian Sumdawng ten an bungrua an discount thin a, hemi denchhen hian Fake message a darh(Viral) chiam thin. A bik takin season sale leh midnight sale hi mipui ten kan bawr nasa a, hei hi remchangah hmangin Online shopping (Amazon, Flipkart, Myntra, Snapdeal etc.) lem an siam a, products tlawm lutukin an zuar thin. Hetiang kan dawng anih chuan delete nghal hmiah a him ber.

5. Sorkar thu pawimawh tak tak ang chi te hi chu a puangchhuaktu DP&AR a awm a, a thu azirin department ten an puang thin bawk. A puangtu dik tak te puan anih loh chuan social media a kan hmuh thin ang te hi chu a rintlak thin loh.

Post hmasatu nih duh vang emaw, kut hlei vang hrim hrima  thu post darh hian social media a tibawrhbang thei thin. WhatsApp group ah ngat phei chuan thu belh-chian tlak loh leh group participants ten an mamawh lem loh thil thu thar post leh forward leh hi kan tih loh a tha khawp mai.  

Chuvangin, Social media tangkai zawk a kan hman zel theih nan verify phawt loh chuan Social media ah thudik lo emaw, belh-chian dawllo group-a kan hmuh nazawng te hi awih nghal lo ila. Kan thu post tur leh forward tur te hi uluk takin chhiar hmasa phawt zel ila a duhawm hle.