Coach berin a sawi chu ‘chiang’ tura ngaih a ni a; mahse, Europe-a nipui bazar inhawng tan meka mite ngaihven ber pakhat, Lionel Messi chungchangah erawh ‘chiang hi a chiang lo’ deuh em ni ang, club lamin thu thar an nei nia sawi a awm leh ta tlat.

Ninganiah Paris St-German coach Christophe Galtier chuan a forward hi June 30-a a contract a tawp rualin a chhuak dawn tih a sawi a, coach meuhvin a sawi chu chiang tur a nih hmel viau laiin zan lamah titi dang a awm leh a, chanchinbu thenkhata a lan dan chuan French giants hian an manager hi ‘a tawng sual palh’ niin an sawi tlat mai.

Galtier-a hian Inrinni zana Ligue 1-a Clermont an hmachhawn tura thuthar lakhawmtute a kawmnaah an inkhelh tur chu ‘Parc des Princes-a Messi-a a khelh tawp berna tur’ niin a sawi a, a chiang viau.

Hetah hian a tawp ta tlat lo thung a, a hnu lawkah PSG hian thuchhuah siamin Galtier-a chu a tawng sual palh (misspoke) tih an tar lang niin Le Parisien chanchinbu leh AFP ten an tar lang a. Clermont an hmachhawn tur chu ‘tun season-a Parc-a Messi-a a inlan hnuhnung ber tur’ a tihna zawk niin club hian an sawi niin an tar lang.

Messi-a hma hun hi a chiang lo hle a, club lam thuchhuah nia sawi hi awm tho mah se chhuak ngei tura ngaihna chu a lian zawk tawh rih tho.

Thla hmasaa ‘a chhuak dawn’ tih sawi a awm atangin kum 21 zet a lo awm tawh, Barcelona a ri nghal a, Saudi Arabia-ah Cristiano Ronaldo zawmin a kal dawn tih a awm a, MLS lamah Inter Miami a ri bawk.

Thu thar awmah chuan Inter Miami leh Barca hi an indawr a, USA-ah kalin loan-in Spain-ah a khel zui dawn tih thlengin sawi a awm a. Amah hian Europe-a la khelh hram a duh tih sawi a awm bawk.

Chhuan kal meka footballer tha ber pakhat, Argentina captain hi kum 35 a ni tawh a, a kawng tur a thlan fimkhur a ngai ve tawh niin football hriate chuan an sawi hlawm.

World Cup nomawi leh nomawi dang, a lak theih ang zawng zawng bakah mi mal chawimawina sang zawng zawng khumtu, Messi-a hian tun season-ah PSG tan goal 21 thunin a thiante thun tur vawi 20 a siamsak a, Ligue 1-ah a zawnin vawi hnih a champion-pui hman bawk.