Lionel Messi leh Cristiano Ronaldo pahniha a duh zawk an zawh chuan Rahul Gandhi-a’n Ronaldo a thlang a, a ngilneihna chu a duh chhan tih a sawi a, footballer tha a tih zawk erawh Messi a ni thung.

India-a eptu party lian, Congress chief hlui leh MP ni mek chuan, “Football team neitu ni ta ila, tunge ka team tana khel tura ka duh zawk min tih chuan Messi ka thlang ang,” a ti.

Gandhi-a hi media conclave-a a inlannaah ram hnuk khawih thil hrang hrang zawhna karah boruak tihzangkhai nan a mi mal thil deuh, liantham lem lote rapid-fire quiz-a zawh a ni a, football atangin cricket thlengin an zawt.

Cricket-ah hian tun laia batsman tha ber ber pahnih, India innghahna, Virat Kohli leh Rohit Sharma te-ah a duh zawk an zawt a, Indian-te ngainat infiamna hi a lo en tam vak lo tlat mai a, “Cricket fan hi ka ni lutuk lem lo va, sawi tur ka nei thui lo hle mai,” tiin a chhang.

Tun laia India-a sawi hlawh, ‘Bharat nge India?’ tih zawhna chu, “India, chu chu Bharat a ni,” a ti.

Netflix nge workout a thlan zawh chuan workout a thlang a. Indian nge Chinese chawhmeh a duh an zawh chuan a ngaihnat ve ve thu a sawi a, duh a thlang thei lo.

Bharat Jodo Yatra a neih hun laia a khabehmul nge tuna a lan dan, inmet fai deuh zawk chu a duh an zawhna chu Congress MP hian engmah chutiang lam a ngaihtuah lem loh thu a sawi a. “Engtin pawh hian tha ka ti vel vek mai,” a ti.

Godfather leh Dark Knight hmuhnawm a tih zawk an zawhna pawh a chhang hleithei lo va, ‘duhthlan harsa’ a ti a, movie ril tak ve ve a nih thu a sawi.

Politician hi ni lo ta se ‘eng pawh’ a ni thei tih a sawi a. “Ka tute (a farnu fate) leh ka thiante bulah chuan zirtirtu ka ni a. Chokaa ka awm chuan ei siamtu ka ni leh a. Politician hi chu ka nihna pakhat a ni ve mai. Nihna hrang hrang kan neih theuh ang hi a ni,” a ti.

The Conclave 2023-ah hian Gandhi-a hian politics thil hrang hrang, ‘One Nation One Election’ atanga BJP MP Ramesh Bidhuri-a’n parliament inkhawma tawngkam mawi vak lova BSP MP Kunwar Danish Ali-a a tawng khum dan thlengin a sawi chhuak a ni.