Lionel Messi leh Cristiano Ronaldo te pahnih hi khawvel footballer piang tawh zinga ropui ber (GOAT) a chhal ngam hial an ni. Anni pahnihah hian ropui zawk tia sawi tur pawh an awm bik lova, a chhan pakhatah chuan an thiam dan leh an ropuina mual hi a dang em a ni. Infiammi zingah anni pahnih ang reng a mahni game khelh thangkhat lian zet hneh taka awp theitu hi an awm lo hial awm e.

An ropui em em rual hian, an chet dan hmang leh an ziarang erawh a hran hlak thung. Winger nia bul tan ve ve niin an football khelh dan kal hmang erawh a dang hle thung. Cristiano Ronaldo hian a ropuina lantirna pakhat atan ram hrang hrang pathum a league title a chawi vek tawh a, chutihlaiin, Lionel Messi erawh Barcelona-ah rinawm taka khelin club ropui tak pakhat tana record awm thei zawng zawng a siam deuh vek thei thung. Lionel Messi hian Ballons d'Or tum ruk chawi tawhin Cristiano Ronaldo hian tum nga a chawi tawh thung. 

An kum a tam ve tawh hle chungin khelmual chhungah chuan player hmuhnawm leh hlauhawm ber zingah an la tel thei cheu a, season liam ta khan La Liga lamah Messi hian Golden Boot a dawng a, Ronaldo pawh hi Serie A leh Euro 2020 (2021) a goal thun tam ber a la ni thei tho bawk. 

Player pahnih inkarah ropui zawk tia sawi bik tur hriatthiam a harsat viau rualin, chungnung zawkna erawh an nei hrang ve ve a, chung an chungnunna panga chu kan han tarlang ang a, hengte atang hian i player duh zawk i lo thlang ve tawh mai dawn nia. 

Messi ropui zawkna 5 te chu: 

5. Discipline - Mual chhunga inthunun kawngah Messi hi Ronaldo aiin a chungnung zawk a, an player pui te laka an chet danah pawh Messi-a hian insumtheihna a ngah zawk a ni. Goal khung tuma an beihna lamah player dang ten tharum nena an lo beih letin Ronaldo aiin Messi hian insum theihna a ngah hle zawk a, thinrim taka Ronaldo an a beih leta chet a thawh thin angah hian Messi chuan cool takin a en liam mai thei thin. 

Football an khelh chhungin Lionel Messi hian red card 3 chauh la hmuin Cristiano Ronaldo hian tum 11 zet a hmu tawh thung. 

4. Long range shooting
    Ronaldo leh Messi te hi goal area bul hnaiah chuan an hlauhawm dan a thu hmun hle a, mahse box pawn hla deuh hlek atanga pet ngaiah erawh Portuguese captain ai hian Argentine captain hi a hlauhawm zawk niin a hriat. 

Messi hian box pawn lam atangin goal 75 zet a thun tling tawh a, Ronaldo erawh chuan goal 57 chauh a la thun thung. Barcelona player hlui hian, game 12.4 a khelhah long range goal 1 zel nei ang a nih laiin, Juventus forward hian game 18.8 a mamawh thung. 

3. Playmaking
    Mual chhunga game thunun kawngah Lionel Messi hi Cristiano Ronaldo aiin a chungnung zawk bawk. Khelmual chhungah La Masia chhuak Messi mit hi a fing zawk a, game thununin thiante tana ball remchang siam zung zung leh an goal thun tur siam sak (assist) kawngah Ronaldo aiin theihna a ngah zawk a ni. 

Lionel Messi hian game 778 a khelh-ah assist 305 a nei a, Ronaldo thung hian game 894 a khelh tawhah assist 229 a nei thung. 

2. Freekick
    Freekick pet kawngah pawh hian Messi hi a chungnung zawk hlein a lang. Achhan chu Lionel Messi hian a career tan tir lamah freekick hi a pet vak ngai lova, chutichung chuan a inkhelh chhungin freekick atangin goal 57 zet a thun tling thei a, Cristiano Ronaldo hian a pet tam zawk hle chungin goal 56 a thun thung. Ronaldo leh Messi te pahnih freekick pet dan technique pawh hi a inang lo hle a ni. 

1. Dribbling
    Ball khalh (dribbling) hi player dang zawng zawng aia Messi-a chungnunna pakhat chu a ni hial awm e. Ball an khalh tak tak hi chu a ke leh ball hi a inhip bet emaw tih mai tur a ni. Ronaldo rawn lar tirh pawh khan a ke chheh rang leh mi a bum thiamna kha a ropui hle a, mahse chung a ropuina chuan a kalsan ve tial tial a, tun hnaiah phei chuan ball keng rei lovin thiante ape zung zung tawh a ni. 

Kum 2014 hnulam atanga chhiarin Ronaldo hian game khatah khalh kual (dribbling) hi tum 2 zel nei ang a nih laiin Messi thung chuan tum 4 zel a nei thung. Man United lama Sir Alex Ferguson-a hnuaia a khelh lai khan Ronaldo hian game khatah dribbling 4 te chu a nei ve thin a, chutihrualin, Messi-a’n Pep Guardiola hnuaia a khelh lai khan game khatah dribbling vawi 9 zel nei anga chhut a ni. 

Cristiano Ronaldo ropui zawkna 5 te chu:

5. Header
    Ball kang tauh (head) kawngah kher chuan Cristiano Ronaldo hi a chungnung zawk hle pawh ti ila kan sawi sual awm lo ve. Centimeter 187 laia sang a ni chungin hmatawng leh defence zingah chuan a sang ber pawl a ni hauh lo. Chuti chungin lei atanga an zuang kang chiah hi chu tauh khalh rual a ni lo. Lionel Messi hi chu a pa lian lova, cms 170 chauh a sang niin ball head kawngah kher hi chuan Ronaldo hi phak ngahna a awm lo. 

4. Penalty

Cristiano Ronaldo hi penalty pet kawngah Lionel Messi aiin a chungnung zawk a, anni pahnih hi an club aiawh a penalty chhuihtu ber an ni chho ngar ngar. Mahse, penalty pek kawngah kher hi chuan Portuguese international hi a elpui Argentinian ai hian a chung nung zawk a ni.

Ronaldo hian penalty 166 a chhuihah vawi 139 a pet goal a, 83.7% a tling a ni. Chutihlaiin, Lionel Messi thung hian tum 129 a chhuihah tum 100 chiah a thun thei thung a, chu chu 77.5% chauh a tling phak. An record en hian Euro 2020-a penalty tum 3 ngawt thuntu Cristiano Ronaldo hi a chungnung zawk a ni. 

3. Leadership
    Cristiano Ronaldo hi hruaitu ropui tak a ni a, a career chhungin a naute leh a thiante thlavang hauhna tum tam tak a lan tir tawh thin. A taimakna leh team tana a inpekna a sang thin hle bawk. A teammate te entawn tur thil tam tak tiin team tana hruaitu pawimawh tak a ni thin. 

Hruaitu ropuiin chak duhna thinlung an put ang hi Ronaldo hian thahnem tak a nei a, chu chuan a thian te pawh a cho phur hle thin, Messi erawh Ronaldo ang hian mual chhungah a phusa ve vak ngai lova, a ni hi chuan tha takin a theih tawpin football a khel mai thin a, thiante fuih phur leh an thlavang hauh kawngah te leadership quality han tih lan leh tumna a nei lutuk ngai lem lo. 

2. Fitness
    Temple ang maiin Cristiano Ronaldo hi chuan a taksa a vawng thinghlimin a uluk a, a fitness chhiatna tur a nih dawn chuan a taksa tana thalo tura a ngaih chu a ei-in a in ngai lo. Kum 36 a ni tawh chungin player ngaihven hlawh ber zingah a la tel theih chhan lian tak pawh a ni awm e. 

Euro 2020 liam ta khan Ronaldo hian Germany lama goal thun tur khan second 14 chhungin meter 92 zet a tlan a ni. Ronaldo hi darkar khata km 32 a chakin a tlan thei anga sawi a ni a, tin inkhelh lai hian thui tak tak a tlan bawk thin. Messi erawh hmun hla lo te te a tlan kual chi a ni thung. 

Kum hnih zetin Messi ai hian Ronaldo hi a upa zawk chungin forward-a tlan chungin defender te pui turin thui tak tak ala tlan let peih reng a ni. 

1. UEFA Champions League-ah
    Cristiano Ronaldo leh Lionel Messi te pahnih hi UEFA Champions League-a goal thun tam ber an ni. Ronaldo hian goal 134 zet a thun tawh a, Messi hi pahnihna niin goal 120 a thun tawh thung. 

Anni pahnih hian Champions League trophy vawi tam an chawi tawh a, Ronaldo hian Messi aiin UCL match-ah chakna a chang tam tawh zawk thung. 

Ronaldo hian Real Madrid-ah Champions League title tum 4 chawiin Man United-ah vawi 1 a chawi tawh a, Messi pawh hi tum 4 tho chawi tawhin mahse, 2005-06 season an champion tum khan Barcelona tana player pawimawh a ni phak lo. Portuguese international erawh Champions League an chawi tum hian top scorer a ni vek thung. Ronaldo hi UCL-ah season 7 zet top scorer a nih theih laiin Messi hi hniam zawk hretin vawi 6 zet chu top scorer chu a ni ve thei tho.