Aizawl; Tunlai a ruihhlo damdawi chhuak thar Metamfetamine chu khawchhak lam atangin Europe leh Arab ram velah te nasa taka thehdarh a ni a, hemi kalkawng atan hian Mizoram chu ruihhlo tawlh thin ten an hmang nasa hle nia thudawn a ni. Excise & Narcotics department thawktute chuan tunhnaiah heng damdawite hi Aizawl ah engemaw zat man ni mahse Mizo thalaite zing-ah ti an la awmlo nia an hriat thu an sawi a. Arab ram leh Europe ah te a market a that avangin a kalkawng atan Mizoram chu an hmang thin a, heng te hi an lo man mai thin niin an sawi bawk. Excise thawktute chuan metamfetamine siamna atana hman thin Pseudoephedrine chu Mizoram kaltlangin khaw-chhak lamah an tawlh tawh meuh lo niin an sawi bawk a. Hei hi a chhan chu demand a san tawhloh bakah Manipur kaltlanga engemaw zat tawlhchhoh anih thin vang niin an sawi bawk. Metamfetamine kawl leh zawrh hi a case a lian hle a, tlemte kawl pawh thla 6 chhung lungin tan leh Rs. 10,000 thleng chawitir theih a ni a. A tam tham deuh phei chu kum 10-20 thleng lungin tan bakah Rs. nuai 2 thleng chawitira hrem theih a ni.