ZALEN June 4, 2025; Excise & Narcotics Department chuan June ni 3, 2025 (Thawhlehni) zing dar 8:20 khan New Diakkawn, Chal lui veng, Kolasib-ah Methamphetamine nei nia puh mi pahnih – Lalbiakhnuni (47) d/o Laldinthara (L), New Diakkawn, Chal lui Veng Kolasib leh Lalrinchhani (42) d/o Ronghinglovalova, New Diakkawn, C.P. Road Kolasiba khawsa nia inchhalte chu an man.

Excise & Narcotics hotute hmaa an inpuanna bawhzuiin June ni 3, 2025 chawhma dar 10:30 khan Ṭumpui Veng, Kolasib-ah Methamphetamine Kg 2 & gram 900 (Tablet 30,000) leh hemia inhnamhnawih nia puh midang pali – Vanlalruaia (60) s/o Darneihkuala (L), Ṭumpui Veng, T-Section, Kolasib; Lalbiakchhunga (34) s/o Laldawngliana, Ṭumpui Veng, T-Section, Kolasib te, Ahmad Hussain (33) s/o Badruj Jansan, Ranugram, Karimganj District, Assam; Sadikul Haque (23) s/o Jamal Uddin, Singaria, Karimganj District, Assam-a khawsa nia inchhalte an man a. Methamphetamine phurh khualna atana an hman Suzuki Access Scooter Regn No –MZ05A-3922 pawh hrensak nghal an ni.

 Heng Methamphetamine te hi State pawna hralh tum mek lai a ni.Ruihhlo vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, June ni 4, 2025 khan District Court, Kolasib-ah hruai nghal an ni.

#ZalenNews