Mexico rama khaw te tak te mayor pakhat chuan nupuiah awle a nei. Mipui hmaah an inneih ni hian awle hi mo thuam a thuam thlapin a pawm a, a chalah a fawp hmiah. 

Khawvel-a cheng mihring zingah hian mize mak tak tak hi kan tam khawp a, kan hmel leh rilru puthmang a inan loh ang bawkin kan khawsak duh dan pawh a in persan thei hle. Lar leh hmangthan kan duh dan pawh a dang hlawm teh e. Tun tuma nupuia awle nei hi chuan lar ngawr ngawr a khel lo va, khuanu malsawm dawn nana ti niin a insawi.  

Mexico rama state pakhat Oaxaca-a thingtlang khaw pakhata an tualchhung roreltu mayor Victor Hugo Sosa chuan kum sarih-a upa awle chu nupui atan a nei hmiah. An inneih ni hian inneih hriatpuitu pawh mithahnem tak an pungkhawm a, an inneih lai hian mo hi mo thuam nen thlapa cheiin mopa hian duat takin a pawn than bawk. 

He inneihna thlen chhan bul ber pakhat chu, puithuna thil vang a ni a, khawtlangin khuarel malsawm an dawn thin lawmthu sawina leh malsawmna an dawn chhunzawm zel theihna tura tih a ni. 

San Pedro Huamelula mayor Victor Hugo Sosa chuan an pi leh pute hunlai atang an lo tih tawh thin angin khuanu tih lawm nan thil siam zinga pakhat hi nupui atan a nei ta a ni. Mopa Sosa chuan,"Khuanu hnenah ruahtui malsawmna te, chaw ei tur te leh lui lama sangha tam tak awm tur ten kan dil thin a ni," a ti. 

Sakhua leh puithuna rawngkai inneihna hi hmasang atanga an lo tih tawh thin dan niin Mexican mayor hian an inneih nemngheh nan a nupui awle hi a fawp a ni. Awle hi lalfanu tia chhalin lei pathian nu aiawhtu niin an sawi a, an inneih lawmpui tu thahnem tak te chuan rimawi chi hrang hrang an tiri a, inneihna hi festival ang maiin an hmang a ni.