Aizawl: Mizoram Pradesh Congress Committee chuan nimin khan thuchhuah siamin MNF sorkar chu sum enkawl thiam lovah an puh a, Krismas hma ngeiin ni za inhlawhna - Mahatma Gandhi National Rural Employment Guarantee Scheme (MGNREGS) sum chu a dawng tur te hnenah pe turin an phut.

MPCC thuchhuah hian a tarlan danin Khawzawlah August thla atangin MGNREGS hlawh hi an la mumal tawh lo a, Khawzawl-ah hian Job Card 2670 awmin MNF sorkarin Khawzawl mipui sum, mipui nawlpui inhlawhna cheng nuai tam tak a ba mek a ni, hetiang zat zet an bat lai hian district thar lawmna atan job card neite chu an ni khat hlawh theuh thawh tir an ni, an ti.

Ngopa RD Block hnuaia mite pawhin September leh October thla chhunga an inhlawhnate vawiin thlengin an la thei lo a. Thingdawl RD Block hnuaia khaw thenkhat pawhin August thla atangin MGNREGS hlawh hi an la thei tawh lo a, niin an tarlang bawk.

MNF sawrkar chu sum leh pai enkawl thiam lovah puhin, sawrkar sum lakluhna tur lam ngaihtuah lo leh thawhchhuah lam aia central sawrkar lama dil lam chiah ngaihtuah tiin kutdawh sawrkarah an insiam a ni ber a, mahse, sum lam hi an duh anga an dil chhuah leh theih si loh avangin an talbuai mek. Contractor sum tam tak an bat mai bakah sawrkar hnathawk pension te sum chhuahpui tur pawh pe thei lovah an puh a, ni za inhlawhna thleng pawhin an ba ta zel a ni, an ti.

MPCC chuan MGNREGS hlawh la thei lote chu an lainat takzet tih an thuchhuahah hian an tarlang a, Kristiante hun pui ber Krismas hma ngeia pe turin MNF sawrkar an phut.