March 21, 2024; Wildlife (Protection) Act 1972 (Nungcha humhalhna dan bawhchhiat vanga man mi 3 te chu district jail, Kolasib ah dahluh an ni.

Divisional Forest Officer, Kolasib Forest Division in thuchhuah a siam a tarlan a nih danin, March ni 4, 2024 zing dar 4:40 vel khan Vairengte Forest Range Staff leh Excise & Narcotics tangkawp chuan Saphu kawr kg 98 vel an man a, Saphu kawr hi sumo a phurh niin, driver Laldaniela S/o Ranjit, R/o Happy Valley, Shillong chauh a chuang a, a hmunah man nghal a ni.

Hemi case hi chhuizui niin, hetiang sumdawnna lamah hian a zawmpui te chhui chhunzawm nghal a ni a, he thil a inhnamhnawih ngei nia hriat mi pahnih, Lalzuithangi (41) W/o Ramchhanthanga, Champhai leh Vanlalzawni (42) W/o Lalbeiseia, Zemabawk, Aizawl te chu man an ni a, Aizawl lam atangin mi pakhat Laltanpuia S/o Tlangthanluaia, Bethlehem Vengthlang, Aizawl a khawsa mek man tel a ni a ni bawk.

An chhui mek Lalzuithangi hi Wildlife Crime Control Bureau, Govt. of India te pawhin hun engemaw chen atanga an lo chhui tawh a ni a, a zawmpui sapel mi (Poacher) atanga inhnamhnawih ho pawh an man kim thawkhat tawh a, Mizoram atanga Burma a a zawmpui chhui mek niin, amah hi evidence tha tawk nen a man tum a an veh lai mek a ni a, Guwahati jail a tang mek Rindiki Reronpi, Karbi Anglong, Assam a khawsa nen Sakei Vun, a ruh leh Saphu kawr hmang te a sumdawng in an lo thawk dun tawh thin.

An mi chhui ber hi March ni 14, 2024 khan Shillong ah RO Vairengte, RO Kolasib leh staff te leh Meghalaya Forest department te tangkawpin a thurualpui te nen man an ni a, March ni 16, 2024 ah Kolasib rawn thlenpui niin, Laltanpuia, Bethlehem Vengthlang, Aizawl a khawsa mek an thurualpui pawh hemi zan hian Aizawl Wildlife Division Staff ten man in, Kolasib lamah an chhukpui ve nghal bawk.

Heng mi pathum an man te hi Forest Custody ah darkar 96 kawl niin, thu zawhfiah an nih hnu ah nimin, March ni 20, 2024 tlai dar 6:30 vel khan Lalzuithangi leh Vanlalzawni te hi district jail, Kolasib ah dahluh an ni a, Laltanpuia, rinhlelh thil thu a man erawh he thilah hian a inhnamhnawih na hmuh a nih loh avangin magistrate in a chung a charge a drop hnuah chhuah leh nghal a ni.