Aizawl: Central YMA Vice President Lalhmachhuana chuan, “Hnathawh thuamhnaw haa thlan tlaa hlawh hmuh ai chuan smart taka mi bum ching kan ngaisang a, hengte hi kan sim a hun tawh hle a ni,” a ti.

Maubawk Branch YMA-in Zirtawpni zana YMA kumpuan, ‘Ram leh Hnam Humhalh’ hawnna hun a hmanpuinaah he thu hi sawiin Central YMA Vice President Lalhmachhuana chuan, “Mizote hi hman thuawih leh hruai nuam kan ni a, system tha tak a awm chuan kan zui hreh lo a, system tha kan duan thiam a, chu chu kan ngaihtuah chhuah a ngai a ni,” a ti.

Mizoten dam khawchhuah kan khel mek tih sawiin, “Kan hriatreng tur chu Mizoram ramri km 772 pawn lama awmte hi survival khel vek an ni a, heng zingah hian kan chipuite pawh an awm. India ram khua leh tui nih khel ngar ngarte pawh an awm a. Min hual veltute hi survival khel vek an ni a, anni chuan hnathawhna chang an hria a, keini a ram chhung mite zawk lah hi kan awm mai mai a. Hna kan thawh ve chhun lahin tawrh chhelna kan tlachham a, anni chuan chhel takin hna an thawk a, hetiang renga kan kal chuan min la luahlan thei tih kan hriat a tha hle a ni,” a ti.

Lalhmachhuana chuan, “Hlawkna kan duh avangin a dik leh dik lo kan ngaihtuah hman lo a, hlawkna kan duh avangin mi dangin tuar mah se pawi kan ti tawh lo. Hei hian kan khawtlang nunhona a tichhia a, thlantlaa hnathawh ai chuan dik vak lova sum lak luh kan duh tawh zawk a, hei hi siam tha tur chuan ram leh hnam humhalh kan tih hian a huam tel vek a ni. Mi tlem tê-ten an tih hram hramna avangin kan hnam hi tun dinin a la awm a, a la tlusawp lo mai mai a ni,” a ti bawk.