Aizawl June 30, 2024 : ‘Working Committee to look into the Maintenance & Management of Lengpui Airport’-ten enkawltu dang hnena Lengpui Airport hlan chungchangah ngaihtuah an seng mek a, an report sawrkarah an thehlut hnai.

Working group chairman TBC Lalvenchhunga, MLA, Adviser to CM (Finance & Planning) hnen atanga ZALEN thudawn danin tun thlenga hma an lak tawh chinah, Lengpui Airport chu mi dang kuta hlan pawh ni se Mizoramin hlawkna a la neih ve dan tur ngaihtuah a ni.

TBC Lalvenchhunga chuan committee-in kumin July 31, 2024 thleng hun an la nei tih sawiin an report sawrkarah an thehlut hnai niin a sawi.

Enkawltu dang hnena Lengpui Airport hlan chungchanga Airport Authority of India (AAI) leh mi dangte nena inbiakna an neihah an biakte an inhawng viau zel niin a sawi a, indawrna kalpui mek zel a nih thu a sawi.

Working Committee to look into the Maintenance & Management of Lengpui Airport report sawrkara thehluh a nih hunah a ngaihtuahtu tur sawrkar mi pawimawhten chu an report atang chuan airport enkawl zui zel dan tur chungchangah thutlukna an siam ang.

Chief Minister Lalduhoma’n January 6, 2024, Inrinni tlaia press conference a neihah airport chu mi dang hnena hlan tum a nih thu a lo sawi tawh.

“Keini ang state rethei tan airport enkawl reng hi thil tih chi a ni lo. AAI emaw, Adani Group emaw hnenah hlan ni se kan ti a, Adani Group hian DO letter an rawn ziak tawh a. Tu hnenah zawk nge pe ila tha ang tih kan zir chiang ang. A rang thei ang berin mi dang hnena hlan kan duh a, Civil Aviation Ministry-in an buaipui dawn,” tiin a lo sawi tawh a ni.

Lengpui Airport chu AAI hnena hlan turin hma lak a ni ang, tiin December 13, 2023-a Council of Minister thukhawmin a lo pawm tawh bawk.