DOWNLOAD OUR APP

Read latest news on your phone
app-store
Mi fel Bo - K.L.Rochama
Jul 02, 2016
Pathian thu sawitute hian mi sual bo chanchin an sawi deuh ber a, mi fel bo chanchin sawi ngaihthlak tur erawh chu a tam lo hle. Chanchin Tha ziaktu paliten Isua chanchin an ziah hi ngun taka han chhiarin Isua hian mi sual bo chanchin aiin mi fel bo chanchin a sawi tam zawk a. Mi sualte a ngai thei a, mi sualte a bulah an tlangnel a. Mi felte, abikin Farisaite a ngai thei lo va, anni lah a bulah an tlangnel hek lo. Isua chanchin ka chhiara mak ka tih chu mi sual a ngai thei chauh a ni lo va, Kohhran Dan hmanga den hllum tlak khawpa mi sual leh Rom sorkar pawhin mi sual vawr tawp, Kraws-a khenbeh tlaka an ruatte pawh kam khat mahin demna thu a chhakchhuak ngai lo hi a ni. Ni khat chu Juda nu uire lai an phawk a. Mosia Dan hmanga denhlum turin Isua hnenah an rawn hruai a. Isua chuan, “In zinga sual nei lovin lungin deng hmasa rawh se,” a ti a. Pakhat khatin an kalbo ta vek a. Isua chuan uirenu chu kamkhat mahin a hau lo. “Tuman thiam loh an chantir na che nge?” tiin a zawt ringawt a. Uirenu chuan, “Chantir lo, Lalpa,” a ti a. Isua chuan, “Kei pawhin thiam loh ka chantir lova che; kal la tun chinah tisual leh tawh suh,” a ti a. (Joh 8:4ff) “Khawvel thiam loh chantir turin Pathianin a Fapa khawvelah a tir lo, khawvela Amah avanga an dam theih nan a tir a ni zawk e,” (Joh 3:17) tia a lo sawi tawh chu Isua hian thiltihin a rawn nemnghet a ni. Entirna dang pakhat i han tar lang leh teh ang. Jerusalem dai Kalvari tlanga Isua an khenbeh rualin Rom sorkarin suamhmang pahnih an khengbet a. Pakhat zawk chuan, “Krista chu i ni lo vem ni? In ti dam la, keini pawh min tidam ta che,” a ti a. Pakhat zawk chuan, “Pathian meuh pawh i hlau nange? thuhmun rengin an hrem che hi. Keini zawng hrem zia reng kan ni; kan thiltih man chauh hmu kan ni hi; hemi hi zawngin engmah a tisual si lo...Isu, i ram i thlen hunin min hre reng ang che,” a ti a. Isua chuan, “Tih tak meuhin, tih tak meuhin ka hrilh a che, vawiinah hian ka hnenah Paradis-ah i awm ve ang,” a ti a. (Joh 23:39ff) A va mak em! He pa hian baptisma a chang hman lo va, leiba alo nei pawhin a rul hman lo. Paula chuan, “Hna thawk lova, Pathian pawh ngaihsak lo, thim chantirtu ring zawka rinna chu ama felnaa ruat a ni,” (Rom 4:5) tiin Krista tlanna a sawi fiah a. Isuan heti khawp mi sual bote a ngaihsak laiin mi fel bote chu a ngaihsak lo chauh pawh ni lovin na tak takin a dem thin a. Lehkhaziaktute leh Farisaite chuan Mosia Dan sawm fet taka an zawm bakah Dan siper (Rule) 613 an siam belh a. Chung Dan siper zawmna tur thupek (Commands) 248 leh tih loh tur (Khapna =Prohibition) 365 zetin an thliar leh a. Heng Dan siperte hian hian hrilhfiahna (amendations) 1,521 zet a nei leh a. Entirnan: Thu Sawm Pek pathumna “Lalpa i Pathian hming chu i lam mai mai tur a ni lo” tih hi bawhchhiat an hlauh avangin Hebrai hawrawpa Pathian hming YHWH hi an chhiar thlen veleh “Adonai” tiin an lam thin a. Hebrai hawrawpa Adonai “Sign” chu YHWH-ah belin a lam rik awl turin “Jehovah” tia dah a lo ni ta a ni. Pharisai zinga fir zualte chu khawlaia an kalin hmeichhia an hmu ang a, tisa châkna sualah an tlu ang tih an hlauh avangin hmeichhia an hmuh loh nan an kun tlat thin a. A then chu lung bangah te an intauh thi thin a. Heng hi “Bleeding Farisai” an ti a ni. Farisaite hi pawn lam lang theiah chuan Isua pawhin fel a ti a. “In felnain lehkhaziaktute leh farisaite felna a khum loh chuan van ramah in lut tawp lo vang tih ka hrilh a che u” (Matt 5:20) tiin Farisaite felna hi tehfungah a hmang hial a ni. Hetih rualin Isua chuan pawn lam felna ringawt, chhung lam thianghlim silo chu, “Thlan hnawih var, pawn lama mawi taka lang, a chhung lam erawh chu mitthi ruhte leh bawlhhlawh tinrenga khat in ni a sin” (Matt 23:27) tiin Farisaite chu na takin a dem a. Farisaite hi mi fel, vervek taka lemchanga nung an ni a, mi fel, vervekte hi Isua ngaih theih loh ber an ni. Matthaia 23-ah ringawt hian Lehkhaziaktute leh Farisaite hi, “in chung a pik e” tiin Isuan vawi sarih (7) zet a hau a ni. Mi vervek chu mahni nihna thup a, nih loh anga inlan, lemchang an ni. Bul deuhah i han chhui teh ang. Adama leh Evin Pathianin ei loh tur tur a tih thing rah an ei atangin Pathian nen an inzawmna a lo chat ta a. An nihna dik tak in Pathian hmaah an inlan ngam ta lo va. “Adam, khawnge i awm?” tia Pathianin a rawn koh pawhin Adama chuan, “Ka hlau ta a, ka biru ta a ni,” (Gen 3:10) tiin a chhang a. Hei chauh hi a ni lo. An nihna dik tak khuhbo tumin, “Theipui hnah an thuikhawm a, pawnfen an insiam chawp a” (Gen 3:7) Eden huanah pawh lem an lo chang tawh a nih chu!. He rilru piangsual hian Isaka nupui Rebeki leh a fapa Jakobate pawh lem a chantir a. Esauva lema changin an pa, putar Isaka bumin Esauva chan tur, malsawmna an chhuhsak a ni. Mi fel bote hi zawn hmuh an har thin. Isuan Luka 15-a a sawi, Beram bote, Duli bote leh Fapa tlanbote chu zawn hmuh an ni a, mi fel 99 leh thahnemngai taka a pa tanpuia hna thawk thin, fapa upa zawkte chu zawn hmuh an nih thu sawi a awm tlat lo. Adama te nupa theipui hnah thuikhawm pawnfen phena an biru angin vawiinah hian Kohhran member tam tak Pastor te, Upate leh rawngbawltute telin, kohhran phenah an biru a. Heng mite hian chhungrila thlamuanna leh lungawina tak tak an nei lo va, an chhungril nun ruak thup nan tisa takin tan an la vak thin a. Pawn lam lan danah chuan Farisaite angin Kohhran tana thahnemngai ber, taima ber leh fel ber berte an ni a. Inkhawm leh zaikhawmte an pelh ngai lo va, Mission field tlawh program-ah a phur ber ber an ni a. Thawhlawm leh Missionary chawmah lah hmahruaitu an ni si. Hetiang “Mi fel bote” hi Kohhran hruaitua thlan loh theih an ni lo. Kohhran hi Isua tlanna azara mi sual ngaihdam awmkhawmna a nih avangin a famkim lo a ni. Isua zirtirte zinga sum vawngtu hial ni thei, Juda Iskariota a awm angin Kohhran ding tirah pawh Annania leh Saphiri te, Dema te an awm tih Bible-in tlang takin min hrilh a. Isua unau Juda pawhin, “Mahni chauh inngaihtuah, chhum ruahtui pai lo (Thlarau Thianghlim nei lo) favang thing rah lo (an vanglai hun tha berah pawh an rah hmuh tur awm lo), zung chawpa tlu kar vek tawh (Thi reng si, nung hming pu)” Kohhranah an awm thu a ziak a ni (Juda 12). Kohhranah hetiang mi fel bo an awm hi famkim lohna khawvelah kan la awm a ni tih min hriattirtu a ni. Kohhran hi khuairau ang a ni a. A let zawnga vung taka thlawk te, a sir zawnga thlawk te, vir kual mai maite an awm a. Mahse, hmalam panin an kal tlat a ni. Joba chanchin i lo en teh ang. Joba chu, “Mi famkim, mi ngil tak, Pathian tih mi, thil tha lo laka insum thei mi a ni” tih Bible-in vawi thum (3) zet a sawi a (Job 1:1,8; 2:3); mahse, a bo tlat. Felna phenah hian a biru a ni. A thian pathumte chu “Ka bona lai min hriattir rawh u” (Job 6:24) tiin a cho a. Rei ngial an dawp pawhin an dawp chhuak zo lo va. Pathian a rawn inrawlh hnuah Joba hian a bo tih a pawm a, “Benga hriatna mai chuan ka hre tawh chia, mahse tunah zawng ka hmu ta che. Chuvang tak chuan ka intena, vut leh vaivuta thuin ka sim ta e,” (Job 42:5ff) tiin tlawm leh zah pawh dawn lovin a inpuang ta chauh a ni. | Mizorama Kohhrante hi “Mi fel bo” khawi ngamtu, tisa mite rawngbawlna atana duhthusam a ni zo tain a lang. Kan thahnemngaihna leh Mission rawngbawlnaa kan inhman nasatziate hi tisa rilru chuan a ngaisang lo thei lo. Mahse, kan rawngbawlna rah han belhchian hi chuan Zawlnei Elisa hun laia Jeriko khawpui angin “Nau chhiatna ramah” kan insiam ta mai em ni tihte a ngaihtuah theih rum rum ta a nih hi (II Lalte 2:19ff). Entirna tawitein i han titawp teh ang. Hman deuh khan phai lam atangin Mizo IAS Officer Aizawlah an rawn sawn a. Thla khat emaw chauh a awm hnuah a awmna veng kohhran pawl pakhat chuan Sunday School zirtirtuah an ruat a. Kohhran lehkha a han hmuh chuan mak a ti a, a pawm ta lo va. He officer hi ka hmelhriat hnai tak anih avangin hmaichhanah ka zawt ngat a. “Nia mawle, an kohhran mi emaw min ti a ni awm asin!” tiin nui chungin min chhang a. Hei hian kan Kohhran zia a tilang chiang hle awm e. Mi fel boten tlar hma an luahkhah thupna Kohhranah chuan mi sual bote tan hmun a awm thei lo. Kohhran neitu Isua chuan pawn atangin, “Ngai teh, kawngkhar bula dingin ka kik hi; tupawhin ka aw hria a, kawng a hawn chuan, a hnenah ka lut anga, a hnenah zanriah ka ei anga, ani pawhin ka hnenah a ei bawk ang,” (Thup. 3:20) tiin a la au ta reng a ni. Tunge luhtir ang?
MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh