Insakna, lirthei leina, contract hna thawhna, sumdawnna leh mi mal leh chhungkaw mamawh atan te ‘loan’ kan puk thin. ‘Loan’ hi Bank leh Financial Institution eg. NABARD, SIDBI te, Financial Services Company eg. Bajaj Finance Ltd., Mahindra & Mahindra Financial Services Ltd., te leh mi mal hnen atangin puk a ni thin. Bank leh company te chuan loan an pek dawnin document felfai tak, loan puktuin a loan a rulh thei ngei dawn tih chianna an duh thin a, dahkham emaw, guarantor emaw an demand a; tin, loan latu ah ‘life insurance’ an ti tlangpui bawk thin. ‘Loan’ rul thei lote thin danah pawh kalphung mumal tak an nei a; chuvangin, mi mal hnen atang loan lak/pawisa puk chungchang hi i han zirchiang dawn teh ang.   Bank leh Financial Institution te chuan document an duh uluk a, loan pek chhuah pawh a fimkhur viau thin avangin mi tam takin hna laklawh leh thil hmanhmawh thlakah te mi mal pawisa an puk fo thin. A puktu tan chuan mamawhna avanga puk a nih avangin a hunlai chuan thil tha leh awlsam tak a ni. A puktirtu tan erawh ngaihtuah fimkhur ngai tam tak a awm. Pawisa puk laia an intiamkamna chu eng ang pawh ni se, a pawisa puktuin a intiam anga a rul thei lo a nih chuan mahni thua kaltlangpui mai theih thil hi a awm meuh lo a, court kaltlanga thubuai siam hial a tul thin.   Entirna: Pu Liana pawisa cheng nuai 5 chu Pi Pari chuan kum khat chhung atan cheng nuai 2 a punga rulh turin a puk a, Pi Pari pasal LSC dahkhamin, an pawisa puk chu kum 1 chhunga a rul thei lo a nih chuan LSC pawh chu pawisa puktirtu, Pu Liana chuan a nei ang tiin ‘Intiamkhamna’ pawh thuhretu 2 neiin an ziak thlap bawk a. Kum 1 a lo liam chuan a pawisa puk chu Pi Pari chuan a rul thei ta hauh lo mai a. Pu Liana chuan ama hminga LSC chu thlak tumin Revenue Office-ah a kal ta a; mahse, chuti maiin LSC hming thlak chu a lo theih hauh lo mai. Inleina emaw, inpekna emaw, inrochunna emaw lehkha Revenue Office lamah a lo ngai ta si a, inlei ziah lah Pi Pari te lamin an duh der si lo. Pu Liana tana kawng awmchhun chu court-ah an pawisa inpuk chungchang thlena an intiamna anga thil a kal loh avangin LSC neitu nihna dil emaw, an intiamna anga a pawisa puk leh a pung rul tura dil emaw a ni ta a, chutah chuan court fee bakah ukil rawihna sum eng emaw zat sengin kum 2/3 lai court thubuai a neih a ngai ta a ni.   A chunga kan sawi tak ang hian pawisa puktu dinhmun hi a hlauhthawnawm zawka ngaih a ni. Nakina buaina zakhua tawn lohna tur chuan mi dang pawisa puktir loh hi a him zawk fo tih hriat a tha. Pawisa puk kual thin mi tam tak an awm a, hengho hian mi tam tak nun an lo tichhe tawh. Pawisa nei deuh te, pension pawisa hlawm la tihte an hre thei em em a, rinawm taka insawiin intiamkamna thu tha pui pui an ziak a, chung pawisate chu anmahni tan emaw, mi dang pawisa an bat rulh kual leh nan te emaw an hmang a, an inbât hnawk zel a, chutah chuan mi dang an hnuk lut ve zel bawk a. Pawisa puk dahkham atante hian mi dang LSC han hman mai turte hi an hmu thei hle. Miin, “In LSC awm mai mai, eng atan maha in hman loh hi kan lo hmang lawk ang a, thla 3 chhungin cheng sing 5 inhlawh mai dawn a, in LSC hi in hmu let nghal bawk ang,” an lo ti a nih chuan inbumna a ni tih hriaa tih hauh loh tur a ni. In LSC chu mi pawisa tam tak puk nan an hmang ang a, LSC neitu chu pawisa tlemte chauh an pe a, a tam zawk an chang ang a, LSC neitu chu pawisa puk rulh that lohnaah khan hnuh luh ve zel an ni dawn a ni.   Pawisa puk chungchang hi Civil Case a nih avangin police-te’n anmahni thua pawisa puktu leh puktirtu lo koh a, intiamkamna lo ziahtir te, lo vaute hi danin a phal lo. Ba inthinnaah chuan lungawi lo an awm a nih chuan police lama kal hmasa loin court-ah kal tur a ni a. Court Order anga hmalak ngaihna a awm a nih chuan police lam an che ve tur a ni chauh zawk a ni.   Khua leh tui tha ni turin dan zir ila, kan dikna chanvo te hriain, kan ram leh midang laka kan duty te i hlen chuak theuh ang u.