Aizawl March 19, 2021 : Vawiin khan Lunglei-ah Mizo Hnam Run hawn a ni a, he huna thusawitu MNF President Zoramthanga chuan MNF chu an thang zel a ni tiin inthlan an hmachhawn chhovah hnehna an chan zel thu leh kalkhawm hun a nih thu a sawi a, Chunglam lamin ram khaichhuak turin mi nghet chauh a duh tih a sawi a, party rintlak sorkar siam a duh niin a sawi bawk.
    
MNF President Pu Zoramthanga chuan, "Varparh Arsi a engzual zel a, tih ang khan hmun tin aṭangin kan kalkhawm zel a ni. Inthlanna apiangah majority lain MLA, MP, VC, LC, AMC leh District Council-ah chakna kan la a. Kumin hi kan Diamond Jubilee kum a ni. Politics thli chhiain a len darh tawhte pawh kalkhawm a hun ta. I kalkhawm sung sung mai ang u. Tun hi kalkhawm hun a ni, kan inchhir hauh lovang."

"Pathian leh kan ram tan tih thupuia neitu kan ni. MNF-a sulhnu lo nei tawh zawng zawngte i kalkhawm zel ang u. Chunglam khian Ram hnukchhuak turin tui anga nghet lo a duh lo. Mi nghet, rintlak party hi sorkar siam turin a duh. Mite pawhin an entawn sorkar dinchhuak turin kan thawk dawn a ni. Pathianin hun rei tak harsatna min paltlang tir a,Pathianin min hruai zel ang a, in tinin malsawmna an chhar a, an dawn kan duh a ni. Party dang hi chu a nghing lai lai vek a ni. Hawh u, he ram malsawmna haichhuak tur hian Pathianin min hman a tumzia hi i hria ang u," a ti. 

Mynamar ram buai avanga tawrhna chungchang a sawinaah MNF president chuan, "Khawchhak lam unaute kan rama raltlana an lo luh chuan kan tuamhlawm dawn tih ka sawi tawh a. Sorkar laipuiin 'thawnlet rawh u' an lo tih pawh chhangletin, nimin khan na takin sorkar laipui pawh lehkha ka thawn a. Kan inneih pawlh a, kan unaute an ni a, kan thawnlet thei lo; an lo luh chuan ei tur leh chenna kan ngaihtuahsak dawn a ni. Khawvelin China an huat lai taka Myanmar mipui, raltlante in phatsan mai chuan nakinah dem in hlawh mai ang ka ti hial a ni," a ti.