Aizawl: December 7, 2022 Nilaini zinga an chenna in, Mamit Luangpawl Venga Rokimi (51) leh a tupa Mark Lalawmpuia (7) te thia hmuh an nihna a tualthattu nia rinhlelh Rokimi pasal Roliana @ Liantea (36), Myanmar lam mi chu ngawrh takin zawn chhunzawm zel a ni a, he thu ziahlai nimin tlai thleng khan man a la ni lo.

Mamit atanga ZALEN thudawn danin Liantea zawng hian police bakah Luangpawl YMA te leh Sub hqrs. YMA, Mamit hruaitute nimin khan an thawkchhuak leh a, a awmna hmun nia rinhlelh hmun hrang hrangah duty in dahin, man ngei tumin ngawrh takin an zawng mek a ni.

Rokimi leh a tupa hi hreipui hmanga cheh hlum nia hriat an ni a, Rokimi chu khum bulah bawkkhupin a awm a, a lu-ah hreipuia chehna hnu hma hmuh niin, Mark Lalawmpuia chu khumah bawkkhupa hmuh a ni a, a lu-ah hreipuia chehna hnuhma hmuh a ni bawk.

Rokimi te chenna hi mi in hnuaiah a ni a, ruang an hmuh tirh hian kawngka chu pawn lam atanga hawlh kalh a ni. Anmahni thattua rinhlelh Rokimi pasal Liantea chu a tlanbo avangin rinhlelh kai ber a ni.