Mi pali thihna Thuampui veng lungrem chim dan chhui zo; DC-in sawrkarah report thehlut tawh

Admin - Jul 19, 2021

Chhuina report leh thurawn an neihte chu DM&R lamin an la thlir leh dawn

Aizawl; June 11, 2021 (Zirtawpni) zan dar 9:30 vel a mi paliin nunna an chân phahna, Thuampui veng, Aizawla lungrem chim dan chu a chhui tura ruat Aizawl DC chuan chhui zo tawhin a report sawr-karah a thehlut tawh.

Aizawl DC Dr. Lalhriatzuala Ralte hnen atanga ZALEN thudawn danin, lungrem chim dan chungchang an chhuina report leh rawtna an neihte chu Mizoram sawrkar a Disaster Management & Rahabilitation (DM&R) department-ah an thehlut tawh a, chhiattawk chhungkuate hnenah Ex gratia pawh pek fel a ni tawh.

Aizawl DC chuan an chhuina report leh thurawn an neihte chu DM&R lamin an la thlir leh dawn niin a sawi a, hemi chungchangah hian DM&R Secretary Lalbiaksangi chuan Aizawl DC hnen atangin an chhuina report an dawn tawh thu leh department in thlirho tura ruahmanna an siam mek laiin, Covid 19 hripui vangin thawktu lamah harsatna a awm tih a sawi a, remchang hmasa ber a thlirho turin hmachhawp ah a awm mek niin a sawi. 

Tarlan tawh angin, June 11 zan khan Thuampui veng Aizawlah lung-rem chimin a thlanga in pakhat a hnawl a, a chung zawka cheng H.Lalbiakzuala te chhungkua, member pasarih zinga mi parukte chu a hnawl tel a ni. Chhungkaw pa ber Lalbiakzuala chu in chim atangin a vak chhuak a, a fanu Zairimawii chu lei chim hian a kawng chin hnuailam delhin mi tlawmngaiten an lachhuak a, midang Zairimawii fate pahnih - Joseph Lalrinhlua (5) leh Daniel Lalngaihsaka (3) te bakah Lathlamuani (16) leh Laltanpuii (16) te chu thia hmuh an ni.

June 25, 2021 khan State Disaster Response Fund (SDRF) hnuaiah zangnadawmna (Ex-Gratia) Rs 4,00,000 /- theuh hlan an lo ni tawh a, Mizoram sawrkar aiawhin Aizawl DC, Dr. Lalhriatzuali Ralte chuan a pisa-ah a hlan a, zangnadawmna sumte hi Lalthlamuani leh Laltanpuii te hmingin an pa, Lalbiakzuala hnenah hlan a ni a, Joseph Lalrinhlua leh Daniel Lalngaihsaka te hmingin, an nu Zairimawii te hnenah hlan a ni.

Share now