Aizawl; Hmingchungnunga, Bung-kawn Vengthar te In chu nimin zing khan misual tu tih hriat lohten bomb hmangin an bei a, thi leh hliam an awm lo. Hmingchungnunga hi Sinlung Hills Development (SHDC) Chairman niin, bomb hi nimin zing dar 4 rik hma hret khan an verandah-ah tihpuah a ni. He thil thleng hi hriat a nih veleh Police te rang takin an thleng nghal a, CID lam leh Forensic lam pawhin misualte hnuhma hi enin hnuchhui nana thil tulte an enfiah a, Aizawl Police Station-ah thubuai ziaklutin bomb tipuaktute chhui hna hi ngawrh taka chhui zui nghal a ni. Bomb puak hi Gelatine nia rin a ni a, he bomb puak chung-changah hian, nimin tlai dar 3:30 thleng kha chuan rinhlelh man an la awm lo niin thu dawn a ni. Hmingchungnunga te In luah neitu hi Hmingdailova Colney (L) In niin, concrete building a ni a, Hmingchungnunga te hian kawng an hnuai chiah luahin, bomb puahna hmun hi an verandah sir, security guard-te duty-na tura In te an sakna hnuaiah a ni a, bomb puah hun hi duty an awm loh lai a ni a, duty awmna In te, concrete a sak chu a ban a tliak thelh a, a bul vela cement plaster pawh a khawk nasa hle niin thudawnna chuan a sawi. Bomb puak hian Hming-chungnunga te In kawngka pui a tichhe vek a, ventilation leh tukverh darthlalang bakah, an In hnuaia awmte darthlalang leh ventilation darthlalang te a keh nasa hle a. In kawt chiaha awm Hmingliana  te In pawh a bang cement plaster a khawh nual bakah an In darthlalang a kehnual a, bomb puahna bul step leh In chhuat vel pawh a khawk nasa hle bawk.