ZALEN August 29, 2023 : Kum 2018 MLA inthlan dawn khan Mizoram Govt. Lumpsum Aided Higher Secondary School Association chuan Adhoc ngiatin movement na tak an lo kalpui tawh a, Ni 41 school kharin, road block leh khaw chhunga sawrkar office-te an khar tir a, Aizawl-ah kawng zawh an tum a, tuna Mizoram-a sawrkarna chelh mek MNF hruaitute chuan an tlin phawt chuan an tih ngei tur thu an hrilh niin an sawi.

2008 Mizoram Govt. Lumpsum Aided Higher Secondary School Association (MIGLAHSSA) chuan nimin lama 'No Teaching Day' an hman hnuah sawrkhar atanga thu lawmawm an dawn loh avangin vawiin August ni 29 atang hian tiam chin awm lovin an school 9 te khar tan a ni.  

MIGLAHSSA chuan, "Kan sawrkar hian sum an harsat thu an sawi chu kan hre thin; mahse, sawrkar aiin kum 20 zet school lo hahpui tawhtu thingtlang khaw mipuite hi kan rethei zawk tih hi kan sawrkar pawh hian min hriatpui ve se kan duh a ni. Khawtlangin kan mamawhna a san em avangin kan sawrkar chak tak pawh hian min tiam tawh angin Adhoc Grant-in-Aid tura a ngaihna min zawnpui theih kan ring tlat a ni," an ti.

MIGLAHSSA chuan, "Sawrkhar thar a pian veleh kan Chief Minister zahawm tak pawh hmuh nghal niin inthlan hmaa kan boruak leh a ministry hnuaia beiseina sang tak kan neih thu te kan sawi a. Kan thil ngiat Adhoc Grant-in-Aid pawh remchang hmasa bera min tihsak tura ngen nawn leh niin lawm takin kan inbia a ni," an ti.

Lumpsum School te chuan, "Hemi hnu hian kan Education Minister zahawm tak pawh MIGLAHSSA leh school mal Managing Board, party hruaitu ten vawi tam tak hmuh a ni a, beiseina sang tak nen kan Adhoc hun thlirin kan haw thin. Mahse, hun tepter tawh takah school upgradation kalpui an nih dawn tak tak meuh chuan sawrkhar sum harsatzia leh sumin min daih ve tak loh thu hriat a ni leh si a ni," an ti.