DOWNLOAD OUR APP

Read latest news on your phone
app-store

MIHRING MIHRINNA NGE NIHNA/ DINHMUN

Apr 02, 2022

Hun a lokal zel a, chu nula chuan a tir lama buaipuitute chu a hre tha duh ta vak lova, an programme buatsaihna lama zai tura an sawm pawhin zaithiam tamtak chhuanlam tlanglawn tak, ‘ka hritlang’ tih chu a hmangin, a lo buaipuitu hmasate chu a ti hrilhhai ta fo mai! 

Dikteii Hmar
Mission Veng

Kum 20 chuang liamtaa ka tawn hriat pakhat, ka hriatchhuah leh thin a awm a. Aa, pahnih a ni zawk awm e. Pakhat chu – tleirawl zaithiam ang reng tak, la lar lemlo chungchang a ni a. A zaithiam hretu mi thenkhat te’n duhsak takin a zai theihna tur remchang an zawnpui thin a, a chang chuan Aizawl pawn lama zinchhuahnaah pawh an hruai lawp lawp thin. Chutianga remchang nei tam ve ta na na na chu mi hriat a lo hlawh chho ve ta a, zai tura sawmna pawh a dawng chho ve tain a lar chho ta phian mai a. 

Hun a lokal zel a, chu nula chuan a tir lama buaipuitute chu a hre tha duh ta vak lova, an programme buatsaihna lama zai tura an sawm pawhin zaithiam tamtak chhuanlam tlanglawn tak, ‘ka hritlang’ tih chu a hmangin, a lo buaipuitu hmasate chu a ti hrilhhai ta fo mai! 
    
A dang leh chu – Ka hnathawhna hmuna ka kal tur, taxi a ka chuanpui pakhat, chu thu ka hrilh a mak ti em em leh ‘mihring hi nihna leh dinhmun a lo danglam hian engatinge an zia an hloh thin le......’ ti ve vawng vawngtu, pa la valai tak kha a ni. He pa hi a hnu rei vak lovah dinhmun sang takah mipui thlan lalin a awm ta a, ama thusawi ngei chu amah chuan a theihnghilh ta ni maw – inhmuh nikhua pawhin min hre ta lova!
    
Hetiang chi hi hmanlai thil deuh chauh ni tura ka ngaih laiin tunhnaite maia ka thiannu thil tawn min hrilh hian ka ngaihtuahna chu a tithar leh ta a. A thawhna hmuna an hotu thar chu a mi hriat zawng tak, tunhma lam pawha a kawm nel leh anmahni in thleng pawha thlah ve thintu leh eng engemaw a lo tihpui thin a ni a. A rin loh leh a beisei loh takin chu an hotu thar chuan a kawm thin chu sawi loh, a hmelhriat ani tih chu a tilang duh lo mai pawh ni lovin a hming pawh a hre tawh lo thei zu nia!
    
Hman deuh khan office pakhat ka dawr a. Ka biak tur ber kha a hming miin min hrilh, a thutna lai min hrilh thlap bawk a, amah erawh chu ka la hmuh ngai loh a ni thung a. Chu office ka thlen chuan ni-a ka hriat ber chu ka va ko ve tawp pek a! “.... ka ni lo” lo ti ram hmak, hmeichhe la upa lo tak khan min tizakin ka te chem chem mai anih kha. A kutzungchala ka hmuh duh awmna ngawirenga a kawh va na lam chu ka pan a, ka kal sawn rual chuan ka hai avangin ngaihdam ka dil a, ka hmuh duh hnenah pawh chuan ka hai avanga ka inthiamloh thu ka sawi bawk a (ka rilru chhungrilah erawh chuan min chhan dan kha aia upa chhanna tur nia ka ngaih lohna leh tunlai mi tamber hian aia upa an zah ta lo hle mai tih te ka ngaihtuah thung a). 

Hetah hian a thawnthu a tawp mai ta lo lai hian ka rilru ngaihtuahna a ti thui leh viau mai. Chu office chu dawr zui ka ngaih avanga ka kal nawn leh chuan khawvel thila ka nihna kha an lo hre lo thei ta lo (ni berin ka hria) si khan, a hmaa min en mang lova lo tawng ram hmak hmak pawh chu a hnip ta sawt sawt hle mai! 
    
Kei hi ‘keimah’ mai hian ka hlu lo hle thei dawn a lo ni tih leh, ka nihna avanga zah emaw, ngaihsak emaw phu chauh ka lo ni anih chuan mihring hi a lo va hlut loh theih dawn em tih min ngaihtuah zui tir ta zel a. Mihring hlutna hi eng hi nge ni ta ang? Amaha a nihna, Pathianin a duan leh a pek a mihrinna nge, a nihna chelh leh a dinhmun chu ni ta ang?
    
Khawtlangin kan ngaihlut zawng atang hian chu khawtlanga mihring te chuan tum kan lo nei thin tih hi khawtlang nun zirtuten an sawi thin chu a ni a. Mizote pawh hian kan pi leh pute atanga kan inhlanchhawn mihring hlutna kan teh fo thinna leh kan chhawm nun reng thin chu ‘tlawmngaihna’ tia kan sawi lar em em hi a ni a. Peih lo chung chung pawha phur taka miin a hmaa tihtur pual a tih thin chhan bulpui ber pawh he ‘tlawmngaihna’ kan roh em em leh kan hlut em em vang hi a ni ti ila kan sawi sual tam hauh lovang.

Changkanna leh zir thiamnain kan khawtlang min chim a, khawdang/ram dang nundan leh nihphung min hriattirin he’ng kan hawizauna te hian kan nunphung a nghawng chho zel a. Kan hlut zawng leh kan duhzawng pawh tihdanglamin a lo awm chho ve ta zel a. Khawtlangin mi neinung leh hausa a ngaisang chho ta zelin dinhmun azirin mihring kan endan a lo danglam ve zel ta tih hi phat rual lovin a chiang ta hle mai.

Hetiang anih avang hian mi kan tehna chu an thil neihah te, an nihna leh dinhmunah te a lo ni chho ta a. Chumiin a hrinchhuah chu kan hlutna tur nia kan ngaih nih kan tum avanga a dik a dawk thlu lova hma kan la chho ta te, kan nihna leh neih kan chapopui ta thinte hi a ni lo thei ta lo a ni.
    
Amaha hlutna awm, a mihrinna aia a nihna zawk chapopuitu tan hian eng chen nge a hlutna hian a daih ang le?  Zaithiam, chuai leh mai thei (ka sawi tak pawh khi tunah chuan mi hriat a hlawh tawh lem lo) te, dinhmun leh hna, engtik emaw huna kan luah zui loh tur hmachhuan thinte hian chu kan hmachhuan ngei chu kan neih loh hun emaw, kan nih loh hunah emaw kan hlutna chu kan hloh dawn a lo ni reng mai tih hi kan ngaihtuah ngai em aw?
    
Nu leh pate hian kan ngaihlut zawng azirin kan fate nun leh hun hman dan te, an rilru puthmangte kan kaihruai a ni tih hria ila, khawtlang pawhin kan hlut zawng hi kan hmalam hun atana hmasawnna nge boralna kawnga min hruaitu tih chhut ngun a va hun em. Kan tu leh fate tana chenna tlak ram leh lungawina tluantling, awhna sual laka hum thei tur sukthlek dik pe thei khawtlang din hi mitin mawhphurhna a ni tih hre thar leh ang u.

Share now