Russia-in Ukrain a run avangin heng ram pahniha milar tam tak chu Russia president Vladimir Putin demna thu an auchhuahpui. 
Russian rapper Oxxxymiron chuan an ramin Ukrain a run chu a dem zia lan tir nan tour a neih tur chu a thulh tih a puang a, artist eng emaw zatin Russia chet dan an dem thu an tarlang bawk. 

Russia rama lar tak Ukrainian DJ, singer leh songwriter ni bawk Ivan Dorn chuan Russian fan te chu thuchahin, Ukraine chu mahni kea ding (independent) a nih thu a sawi a, ram pahnih inkara innghirnghona chhuak chu tihtawp tura auchhuak turin a fan te chu a chah. Russia sawrkar chetna chu a dem thu sawiin, an ram mipuite a thlawp thu a tarlang bawk. 

Ukrainian pop singer Svetlana Loboda pawhin Russia chetdan chuan a rilru a tihnat tak zet thu a sawia, hla 400 chuang zet record tawh leh album pawh 40 zet tichhuak tawh veteran Ukrainian singer Sofia Rotaru pawh a ngawi hle hle thei bik lo. 

Hetih lai hian Russian artist te pawhin ram pahnih inkara thil thleng chu pawi an tih thu an tarlang a, rappers Kasta, Shym, Vladi, Khamil leh Zmey te chuan Vladi Instagram account-ah a huhoin thuchhuah intawm an tichhuak a, hashtag-ah #notowar an hmang bawk.

Hetih rual hian khawvela huapa milar ber berte pawhin Russia chetdan an dem thu an auchhuahpui a, chung zingah chuan - Miley Cyrus, Yungblud leh Lauren Jauregui te pawh an tel. Russia President Vladimir Putin-a'n laka beihpui a thlak mek hmingah 'special military operation' tih a vuah chu an pawm loh thu leh, indona dik taka an ngaih thu an auchuahpui nasa hle a ni.