Aizawl September 29, 2023: Mizoram sawrkar ruahmanna hnuaia a hmasa ber atan vawiin khan Mim Kut pualin Vanapa Hall ah hun urhsun tak hman a ni. Mim Kut hman dan ruahmantu State Level Steering Committee Chairman Er. Lalrinawma, Social Welfare & Tribal Affairs Minister chu kut thlengtu a ni. He ni pual hian veng engemaw zatah thlanmual thenfai a ni.

Er. Lalrinawma chuan Mim Kut puala hun buatsaih a ni ta chu lawmawm a ti a, hmangaih kal ta te puala remchang taka hun buatsaih chu tih thanah neih zel a beisei thu a sawi. Minister chuan hnam ziarang humhim pawimawhna sawiin, hmarchhak state hnam hrang hrangte hi pawn lam mi tan en mai chuan hmel in ang tak tak, hriat hran har tak kan ni thei a; hranna pholangtu langsar tak chu hnam ziarang leh tih phung neihte hi a ni a ti a. "Pathian in hnam angin min siam a, hnam chuan tih dan phung (customs & culture) a neih te hi hun kal zelah pawh chhawm nung zelin, chu mawhphurhna chu kan nei a ni," a ti.

Sawrkar laipuia Ministry of Tribal Affairs bultuma Department of Social Welfare & Tribal Affairs in vawiina Mim Kut puala hun a buatsaihah hian SW&TA Director Dr. Lalhriatzuali Ralte chuan a vawikhatna atana Mim kut hmang tura ruahmanna siam a inbuatsaih chhoh dan te a sawi a. Mizo zingah Kristianna a luh hnua pi leh pu te’n hnam ziarang leh tih dan phunga an neih tam tak chu thlauhthla mah se, hun kal zelah ngaihtuahna tharin, a thalo lai te paih a, hnam ziarang te seng let leh in, rinna nen pawh inkawprema kal theih dan ngaihtuah a, chutianga hma lam pan zelin an kal tak thu a sawi a. Vawiina Mim Kut hman pawh hi chutiang rilru pu a buatsaih a nih thu a sawi.

Vanapa Hall a Mim Kut hmanna ah hian MKHC leh CYMA atangin thusawi ngaihthlak a ni bawk a. MCO, Art & Culture Dept., CYMA Choir leh adangte atangin hla chham, zai leh lam te ngaihthlak a thlirho a ni.