Ni 13.5.2016 zan dar 6:30 khan Aijal Club-ah Mizoram State Legal Services Authority buaitsaihin ‘Documentary Film on Child Rights’ chu tlangzarh a ni. Documentary film tlangzarhtu Pu Lal Thanhawla, Chief Minister chuan, “Naupangte chu nakin lawka chhungkaw khaidingtu tur an nih angin pi leh pute atanga Mizoten kan chin, tihluihna tel loa naupangten hma an sawn theihna tura hnathawh dan zirtir leh kaihhruai kha a tha em em a, chin zui zel a tha,” tiin a sawi. A sawi zelnaah, “Mizoramah hian naupang khuaikhem hi ram chhung hmun dang aiin tlemin lang mah se thenawm khawveng hmaizah vanga puang chhuak lo harsatna tawk tam tak an awm tih hriaa nasa zawk tan lak a pawimawh” tiin. Enkawltu nei lo naupangten nunkawng zirna mumal an hmu ve lo: Khawvelah hian naupang khawngaih thlak tak tak, nu leh pa hnen atanga thu tha reng reng dawng lo, zirtirtu tha pawh nei lo, hmangaihtu pawh hmu lo, an hmuh chhun ber lah chuan hnathawk tura chhawrluih tlat te, sumdawnna atana hmatheh te leh tihduhdahna karah seilianin hun an hmang a, he khawvela an rawn hmuh hmasak ber chu engnge a ni tih an hriat hma hauhin thim chhah takin a lo hmuak nghal a, nikhua hre thei chang chang tihin an zir chhun leh an hmuh te, an thil hriatte chu engnge a tha a, engnge thu tha lo tih pawh an hre lo. A then chu retheih luat avanga fate pawh duh anga enkawl seilian thei lo, vahvaihpui, rilru rawn insiam tan tirh pawha mi dangte aia hnuaihnung reng renga inngai an ni. Hetiang naupangte hi khawvel hmun tin deuhthawah an tam a, kan ramah chuan hetiang em em sawi tur an la tam lo vang, fahrah erawh kan awm ve fur tawh a nih hi!! Kristian ram kan nih angin naupang chhawr luih, sumdawnna atana han hman chu kan lo awm a nih pawhin sawi tur a la vang viau mai thei a ni. Heng naupangte nunkawng zirna mumal hmu ta lo chuan a rawn thanglian a, a rawn seilian a, mi dangte tana hnawksak, mi hlauhawmah an rawn chang ta thin a ni. Chhantu an ngai, puitu an ngai, an dikna chanvo a awm ve em tiin an au asin: Pathianin mihringte a thiltihtheihna ropui tak a lo dah chu haichhuak thei lovin nuapang retheiten khawvel êng an rawn hmu ve a, rilru thianghlim takin, tap hawm hawm chungin an rawn piang chhuak a, a nu, amah hmangaih em emtu dinhmun a hre lo, a nu leh pate retheih luat a hre lo a ni. A nu leh pate manganzia a hre lo a ni. A nuin a tlansan daih tih a hre lo a ni. A nuten an hralh daih tih reng hre lovin a pianna chhehvel-ah chuan engmah hre lovin a rawn tualleng ve si a le! Khawngaihtu, lainattu, a damloh huna hmangaih taka kuangkuahtu reng a hmu lo, a tap vak vak a, a tuar a, chaw puar khawp pawh hmu lovin hun a rawn hmang a, chutiang chuan naupang tirh rual rawn ni chhovin vin vak vakna leh tihduhdahna hnuaiah thu a rawn awih ve a, sum hmuhna atana an tihduhdanna chuan dikna chanvo reng a nei tih a inhre lo,hetianga naupang insumdawn tawnna rapthlak tak hi kan khawvelah hian a va han rapthlak tak em aw!! Chhantu an ngai ngawih ngawih a, dan a awm reng reng tih an hre lo, dan hnuaiah chuan an mahni humhimna tur duansa tha tak a lo awm si a, an dikna chanvo pe turin kan theihna, kan thiamna, kan huaisenna te thawh khawmin min autu naupang khawngaihthlak tak takte hi kan chhan thei a ni. Keini zawng kan la tlai lo ve; mahse, naupang chunga hleihlenna tenawm tak erawh kan sim a ngai: Kan ramah chuan kan han sawi ang em em chuan min la chim lo deuh, harsatna leh mualphona erawh kan nei thung, chu chu hmeichhe/mipa naupang chunga mipat hmeichhiatna hman luihpui hi a ni. A zahthlak hle mai. Mizoram Police ten kum 2011-2015 thleng pawngsual case 411 an ziak lut a, pawngsual case zingah hian kumtlinglo an tam ber tih a ni. Case ziahluh lem loh, mi dangte hriat hlauh avanga thup bo ta mai mai eng emaw zat sawi tur an awm ngei a rin a ni. Naupang kumtlinglo pawngsual zingah hian hmeichhe naupang chauh a ni lo va, mipa naupang pawh eng emaw zat an awm thin thu a hriaten an sawi thin. Naupang kumtling lo mipat hmeichhiatna hmanpui châk ngawih ngawih kan awm hi a vanduai thlak em em a, piansualna dik tak a ni. “Anmahni a ni lo, a tihsualtirtu sual hi a ngeiawm a, Setana a hi a chimawm tak zet a ni,” kan ti thin. Dik tak ni si; mahse, sualna hi kan hlamchhiah ang a, sual hi kan ti ngampa ang a, sual hi kan vulh lian palh ang tih hi thil hlauhawm tak a ni. Naupang kumtlinglo chunga hleihlenna tenawm tak hi an thiltih sual hrem a ni ngei theihna turin thuneitute hnenah fimkhur takin kan hrilh tur ngei tur a ni. Thiltisualtu danin a hrem ngei theihna turin a tisualtu tisualna finfiahna hrang hrang dan hmaa entir tur neih ngei tur a ni. Pawngsualtu/thiltisualtu an chhuah leh mai thin kan tih fo chhan hi chu an tihsualna kan finfiah theih tawk thin loh vang a ni. A sarhu laiin police-ah kan kal vat thin lo, hei hian dan hmaa finfiahna kawngah harsatna a thlen thin a ni. Dan chuan mi sualte hremna tur kawng hrang hrang a nei a, chu chu hman theih a nihna tur chuan dan hmaah thil an tihsual ngeina kha phawrh chhuah a ngai thin. Court rorelna hi a fimkhur em em a, mi sual ni lo hrem palh a hlau a, thiltisualtu dik tak hrem loh a hlau bawk si a; chuvangin, an tisual ngei em tih kha kawng hrang hrangin finfiah a duh thin a ni. Naupang kumtling lo pawngual, khawih luitute hi a tenawm em avangin mualpho hlauh avanga insawi rem mai mai hi tih tawh loh hram a tha. Thiltisualtu chu hrem a nih ngei theihna turin hmalak vat tur a ni. Naupangte hi kawng dikah kan hruai thei: Chief Minister-in a sawi angin naupangte hi tihluihna tel lovin an hnathawhna kawngah fel takin kan hruai thei a. Mizo pi leh puten naupang an kaihhruai dan kha a fel thu a sawi. Tunlaiah hian changkang kan inti a, tunlai enkawl dan ti reng chunga kan enkawl pawh hian buaipui tham kan nei a, sualna a pung zel bawk si a; chuvangin, keini ringtu Kristiante phei chuan naupangten an dikna chanvo an humhalh theihna turin nu leh pate hian kan fa naupang te te te hi uluk takin i enkawl ang a. Naupang chanvo humhalhsak erawh kan tih tur a ni. Nu leh pa kara seilian ni lo, fahrah naupang khawngaihthlak tak takte an lo pung ve zel a, nuapang tihduhdahnate a lo hluar ve zel ang, heng takah hian naupang dikna chanvo hi danin a humhalh tlat a ni tih kan hre tur a ni. kan tawngkam kan uluk lo va, kan tawngkam bawlhhlawh tak tak kan chhak chhuah thin “Naupang chhia “ tihte hi kan tih loh tawp tawh tur a ni. Riangvai naupangte an dikna humhalhsaktu tur an duh a sin, rethei khawngaihthlak tak takten min au reng a. Tanpui ngai an awm chuan tanpui ila, nun kawng dik an zawh theihna turin tute pawh kan pawimawh lutuk tlat. Ram nuam siam turin naupangte i duat ang u. Kan fate chauh kawng dik zawhpui tur kan ni lo va, naupang hmangaihtu nei lo, chhanhimtu nei lo, anmahni dikna pawh humhimtu hmu lote hi tanpuitu an mamawh a ni. Chatuan nun an thlen theihna turin Pathianin nang leh kei hriselna min pe hi mi dang tanpui ngaite tanpui turin i inring ang u.