December 12, 2022; Mizoram sawrkar, MNF ministry a Minister of States Dr. K. Beichhua chuan naktuk December ni 13, Thawhlehni hian Chief minister hnenah minister atanga banna thehluh a tum a, ban a tum nachhan hi chiang taka hriat theih la ni lo mahse, Siaha district a MNF chhungkua a buaina a awm vang a nih rin a ni.

Social Welfare, Excise & Narcotics leh AH & Vety changtu minister hi Congress sawrkar lai pawha MNF MLA ni a, MNF party tan a thawhhlawk tak a ni a. Siaha atanga ZALEN thudawnna pakhat chuan Minister atanga banna a thehluh hnu ah MLA atanga ban erawh a tum zui a rinawm loh nia sawiin, a awm zui zel dan turah thutlukna a la siam fello nia hriat a nih thu a sawi.

Hetihlai hian tunhnai khan INC chuan Siaha bial a an candidate tur an lo puang tawh a. Dr. K Beichhua hian MNF chhuahsan a MLA nia a bial ngai Siaha bial a din chhunzawm a tum a nih chuan BJP leh ZPM emaw a zawm a ngaih hmel a, a nih loh chuan independent a a din a ngai dawn niin thudawnna chuan a sawi bawk.

Thudawn danin, tun hnaiah MADC sawrkarah MNF leh INC thawhdunna chu paihthlak a lo ni tawh a, Siaha district a MNF chhungkua ah bialtu MLA Dr. K Beichhua dodal zawng a khawsa reng te pawh an awm nia hriat a ni bawk a, chungte chu Dr. K Beichhua-an minister atanga ban a tumna chhan a ni thei nia hriat a ni bawk.