Aizawl: AH&Vety Minister Dr K.Beichhua chuan nimin khan vaibelchhe 51 senga International Border Trading Road, Lobo-Tluangram-Haka kawng sial mek chu a hmunah kalin a enfiah.

He kawngpui hi 13Km a thui tur niin, Tantia Company kawng laih hna hi a thawk a, Funding Agency chu NEC a ni. Kawngpui hi 7.5 meter-a zau niin, pavement area hi 5.5meter-a zau a ni thung. Kumin January atanga hna hi thawh tan niin, tunah hian Formation Cutting 3Km vel an zo tawh a ni. He kawngpui sialna turah hian Lobo khua mipui te chuan compensation beisei hauh lovin a thlawnin an ram te an pe hlawm a ni.

Minister hian Noao-tlah khuaa Eklavya Model Residential School(EMRS) sak lai pawh tlawhin, contractor te chu kumin November thla ral hma a hna hi  thawk zo hman  turin a hrilh hlawm a ni.

Minister Dr. K.Beichhua chuan Lobo  leh Noaotlah khuaah Public meeting neiin, "Sawrkar flagship programme SEPD hnuaiah hmalakna awm lo ang te in opposition Party te chuan min sawi thin a, SEDP atang hian hmasawnna ruhrel tam tak bakah Social Security, Health Care, Road etc. ah te hna kan thawk nasa hle a. Beneficiary base a tanpuina sem tur pawh sem thei tak tak lo turin min sawi thin. Mahse tun atanga rei lo te (Financial Year thar) ah chuan chhungkaw 60000 aia tlem lo hnenah Rs.50,000/- theuh  kan sem dawn a ni," a ti. SEDP hnuaiah hian Siaha district ah tanpuina hi Sericulture Dept. hnuaiah beneficiary chhung-kaw 150, Horticulture Dept. hnuaiah chhung-kaw 75 leh Agriculture dept. hnuaiah chhung-kaw 300 pek an ni dawn niin a sawi bawk.

Minister hian Lobo leh Noaotlah khuaa Myanmar Refugees te tlawhin tanpuinan tangkafai a hlan hlawm bawk a ni.