Aizawl: Agriculture Minister C.Lalrinsanga chuan Zirtawpni khan Thenzawl leh Buarpui inkara Tlawng lei chim chu a tlawh a, lei chu rang taka siam that a nih theih nan chak taka hna thawk turin Contractor te a hrilh. Minister chuan Tlawng lei chu Lunglei District khawthlang lama chengte chak lakna ber a ni tih sawiin, helai hmuna hnathawktu Tantia Company hotute chu lei thar siam mek chu zawh hun tura ruat kum 2020 March thlaa zawh hman tum turin a chah a ni. Thenzawl leh Buarpui inkara Tlawng lei hi nikum December 22 khan truck pahnihin inzuiin an zawh laiin a chim a, leichim chungchangah hian PWD chuan Thenzawl Police Station-ah thubuai an thehlut a, hemi bawhzui hian Police-te chuan lei zawh chimtu truck pakhat zawk khalhtu chu man a, thubuai siamsak a ni tawh a ni. Tlawng lei chim ta hi Thenzawl atanga km. 21 vela hlaa awm a ni a, thirlei ft. 200-a sei a ni a, BRO-in kum 1988-a an dawh a ni. A tirah chuan metric ton 20 phur thei tura duan a ni a, a hlui tawh vangin metric ton 16 aia rit zawh phal loh a ni.