Hman deuh khan Zonet chanchin tharah Khanpui khuain kumin hian sawhthing hralhna atanga cheng vaibelchhe ruk chuang an lak luh thu an rawn puang a, a lawmawm teh e. Kan ramah hian kut hnathawka eizawng hi 60% chuang an ni a, heng mi nawlpui dinhmun hi tha phawt mai se kan ram chu a nuam a ni mai. Chuvangin, sawrkarna fung vuantute pawh hian mipui nawlpui dinhmun chawikan hi mutmawh hnarmawhah neih phawt mai teh se.

Kan rama kut hnathawkte hi an thatchhe ngawt lo. An thai tharte hi man man taka hralhna awm reng se, tumah hi an thatchhe lo tawp ang. Entir nan, sawhthing hi a lo berah kg-ah cheng 40 tala hralhna awm reng se, thingtlang kut hnathawkte hi leiah an lut ang tih hlauhawm khawpin an taima mai ang.

Rate mumal lo te, a changa rate tlahniam leh thut thinte hian kut hnatawkte a tihnual a, an tha a tithum zo thin. Hman deuh khan Chhiahtlang khuaa chhungkaw pakhat chuan a hlawk beiseiin sawhthing quintal tam tak an ching a. A chawh a lo hun chuan an beisei angin rate a tha ta si lo. Kg khat cheng sawm a ni ta chauh mai si. ‘Kg khatah cheng 5 tal kan hlep theih takin’ tih beiseiin hlawhfa tam tak ruaiin sawhthing chu an cho ta a, a phurh nan hlawhfa an ruai leh a, in an phurh thlen meuh chuan sawhthing rate chu cheng 10 atang cheng 5-ah a lo tlahniam leh ta duai mai! Hralh dawn lo se a tawih ral tho tho dawn si. Rilru na em emin cheng 5-in an hralh ta a. An hralhna man tlingkhawm chuan an hlawhfa rawihna man a phuhru che che a ni. A kum leha risk han lak leh chu a phur awm tawh lo khawp ang.

Hman deuh khan Taiwan rama missionary-a awm reng thin, Rev. Zaidarhzauva khan Taiwan rama kut hnathawkte sawrkarin a enkawl dan kha ‘Kristian Tlangau’-ah ngaihnawm takin a rawn ziak a. Taiwan ramah chuan rate tlahniam tih vang ngawtin sawrkarin kut hnathawktute tawrh a phal ngai lo. An thlai tharte rate pangngaia an hralh theih dawn loh tum chuan sawrkarin support price a pe mai a, kut hnathawkte tawrh ai sawrkarin a tuar mai thin. Hetiang tak hian sawrkar hian kan rama kut hnathawkte hmakhua hi ngai se, kar loah an ding chhuak mai ang.

Sawi leh sawi hnu, mipui nawlpui dinhmun hi a that phawt loh chuan hmasawnna tluantling a awm thei ngai lo. Karl Marx-a chuan vantlang nun kawng engkima hmasawnna zawng zawng hi sum leh paia hmasawnnain a hrin chhuah vek a ni a ti tawp mai. Ei leh bar leh sum leh pai dinhmun a that loh chuan kawng dangah hmasawnna a awm thei lo a ti a ni. Hmasawnna tluangtling nei tur chuan sum leh pai dehchhuah kawnga mi nawlpui dinhmun a that phawt a tul a ni.

Kan ramah hian sawrkar hnathawk hi 6% vel an ni a. Kan state budget hnuhnung berah khan sawrkar hnathawk hlawh atan te, pension hlawh atan te, sawrkar hnathawk inrelbawlna atan te kan budget pum pui atangin 78% vel revenue expenditure-ah hman a tul dawn niin a lang a. A bak 22% emaw chauh chu hmasawnna hnathawhna tur, capital expenditure a ni ta a. Tute emaw tawngkam takin fatu hlui hi a buk lutuk mah mah a ni. Fatu lamin puar el euha an ei laiin an rawngbawlsak mipuite hi an tam reng mai ang tih hlauhawm tak a ni. Mipui nawlpui dinhmun siam that a ngai e.