Tunlaia khawvel sorkarin lian ber berte pawhin an buaipui leh hmehmih a tum lian ber pakhat chu rawlrala chetna lam thil a ni a. Hetianga rawlrala chete hian vawi tamtak pawi an khawih tawh a, an la khawih mek zel bawk a. Hetianga rawlrala chete beih letna kawngah hian sum pawh tam tham tak an sengral tawh a ni. Heng rawlrala chetna hrang hrang, inrukbo leh mipui rikrap zawnga chetna reng reng hi a demawm hle. India ramah pawh rawlrala chetna, helna a tam em em a, heng thil hmetmit tur hian sorkar pawhin theihtawp chhuah thin mahse, vawiin thlengin pawi an la khawih reng a, an la khawih zel dawn bawk niin a lang. Nimin piah maiah Aizawl khawpui lun lai, Mizoram rorelna sang ber Assembly House bul mai, Treasury bazarah bomb chak tak a puak a, vanneihthlak takin thi leh hliam an awm lo niin a lang. He bomb puak avang hian dawr eng emaw zat luah zui theih lohin a tichhia a, Assembly Secretariat building leh a chhehvela office darthlalangte pawh a keh nasa hle a. Police ten thubuai ziaklutin he bomb tipuaktu hi ngawrh takin an chhui zui mek a ni. Hetianga mipui tiralkhel zawnga chetna hi mipuiten an malmak a tul khawp mai. Tuten emaw in lungawilohna lantir nana remna leh muanna tichhe zawnga chet an thawh hi mipuiten engtik lai mahin an remti tur a ni lo vang. Remna leh muanna hi a hlu a, hemi vawng nung zel tur hian khua leh tui zawng zawngten mawhphurhna an nei vek tih an hriat thar leh a tul khawp mai. Remna leh muanna hnuaiah lo chuan hmasawnna hna reng reng thawh hleihtheih a ni ngai lo a, mipuite nun a ralti a, khawtlang nun leh ram thlengin kawng tam takah a tuar lo thei lo thin. Hei hi Mizoram hun tawng tawh atangin a chiang hle. Chuvangin, hnamdang tute tihdan emaw entawna bomb tihpuah leh boruak tichhe zawnga chetna reng reng hi mipuiten an dodal tlat a tul tak meuh meuh a ni. Sorkar pawhin remna leh muanna tichhe zawnga chetna thleng thinte ven kawngah tan a lak lehzual a tul ta niin a lang bawk.