May 24, 2023; Hah taka a sum thawhchhuah, a nu hmeithai enkawlna tur atana thawn tum a chhuak, Vanlalauva (27)), Tuipuibari khua chuan Hunthar veng huam chhungah ah misual kuttuarin, chemte a vih a ni a, a pawisa ruk sak vek niin, damdawiinah enkawl mek a ni.

ZALEN thudawn danin, Ainawn veng, Aizawl a in luah a khawsa Vanlalauva hian tun Pathianni, May ni 21 zingkar khan a nu Tuipuibari a awm mek hnena pawisa thawn tur, a inhlawhna te hnen atanga a lak Rs. 25,000 kengin, motor kal remchang turte a ngaihven bakah, a tuk Thawhtanni a pawisa kentir tur te a ngaihven bawk a. 

Hetianga  pawisa a kawl tih hi amah suamtute hian an lo hrelawk nia rin niin, a kawng kal lai chu pawisa an dil hnuah chemte a beih a ni a, a pawisa kawl lai zawng zawng chhuhsak vek a ni. Vanlalauva suamtute hi mipa pali leh hmeichhe pahnih nia hriat an ni a. Pawi an khawih hnu hian an bibo zui nghal nia thudawn a ni.

Beih a tawk tih hriat a nih ve leh damdawiin panpui niin, he thu ziahlai thleng hian Civil Hospital, Aizawl ah enkawl a la ni a, a dinhmun a tha chho zel nia thudawn a ni.

He thil thleng chungchangah hian Vaivakawn PS ah thubuai ziahluh niin, a tul angin police lamin hmalakna an kalpui mek zel nia hriat a ni bawk.

Tuipuibari khua Vanlalauva hi a nu hmeithai kum 60 bawr vel chawmtu leh enkawltu ber niin, suam a tawh hma deuh pawh hian a nu nen inbia in, pawisa leh mamawh dang a thawn tur chungchangte pawh an inhrilh tih ZALEN thudawnna chuan a sawi.