Sual khur thuk taka tanga inngaiin a hmangaihna chu thleng phak lo turah i indah thin em? Harsatna khurah tangin, a hmangaihna chuan a luan thleng ve phak lo turah che i inngai em? He hla — Ka Dam Leh Dawn — tih hi lo ngaithla ve chhin teh. Mizo Idol star David Vanlalpeka chuan single thar a rawn chhawpchhuak leh ta a. A hla thar — ‘Ka Dam Leh Dawn' tih hi 'mittuia bual hnan' ti pawhin sawi ila, a sual tampui lo khawp ang! Ka Dam Leh Dawn — tih hla hi rilru na leh kun ngawih ngawih-in Lalpa a beiseina hla a ni a. A hun tawn avanga beidawnna chhum chhah tak hnuaia leng a, chu harsatna chu inhneh tir mai lova, beisei tur dik Lalpa en a, rinchhan tlat chungin, "Ka dam leh dawn Lalpa vangin," tiin a au chhuak a ni. He hla hi Lalzuimawii Tlau phuah a ni a. He hla hian kan tunlai Zoram natna vei mek — Depression — hi hneh theih a ni tih chiang takin a ti lang a, Pathianin a phuahtu hi a pek a ni tih a chiangin, a lang thei bawk! Hetianga hla flow tha leh inrem fuh em em mai phuah leh siam rem na'n hian hun leh tha sen a ngai hnem hle ang tih a rin theih a. Eng anga harsatna chhumpui zing chhah tak hnuaiah pawh leng se, Lalpa en tlatin ‘ka dam leh dawn' lo ti se tih hi a phuahtu duhdan tak pawh a ni e. Pro Pastor Zonunsanga : He hla hi heti zawng hian ka lo ngaithla a... He hla han thlir hian a hla hian a sawi chu — a hla phuahtu hian harsatna nasa tak tawkin nun beidawnna a tawng a ni tih a lang a. Hmun thim taka chengte chuan khaw eng pawh thlahlel lovin an awmna ngaia awm mai an duh ang hian khur thuk taka tang ang maia inchanin a chau zo a, chakna reng reng a nei tawh lo tih a puang chhuak a. A ruahmanna te a buai a, a lo suangtuah thin te chuan kiansanin a beisei loh em em chu a chungah a lo thleng ta si a. A natzia chu thu hian a sawi chhuak thei lo va, chhungrila ruma na vawng vawng piah lamah mi chak takin puan a pawt thler ang mai hian a taksa chu na lo lai a awm lo a ni tih a tarlang a ni. He taksa na tih hian taksa, rilru leh thlarau thlengin a sawi nghal vek ang tih a rin theih em em a ni. Chuti chung chung pawh chu nise mak tak maiin thenkhat te ang lo takin a nun tihchhiatna'n a hmang duh lo a; beiseina zawng zawng a bo zawh tawh hnuah pawh a thlir tur lam dik tak thlirin Abrahama`n Lalpa a ringhlel lo ang leh Nova`n sawiselna leh deuhsawhna kara lawng a tuk zel tho angin Pathian a rinna a vuan tlat a, Pathian rinawmna chu harsatna ruamah hmuh a tum ta tlat a. Chu rinna mak tak avang chuan Lalpa Pathianin a tidam thei tih ringin a natna leh harsatna zawng zawng ata dam chu a tum ta tlat a. Tlu mah sela an tho leh ang tih ang khan Krista avangin kal zel a tum a, Pathian chuan kaiin a hruai zel dawn a ni tiin harsatna ruamah 'HALLELUIAH' tiin hnehna hla do a chham ta alh alh mai le! A va ropui em! A nunah harsatna lian tak tawkin mahni indemna leh amah ngei ngei pawh inhuatnain a khat a, a chang chuan Joba ang maiin a lo pian chhuah avangin a lungni lo dawn dawn a; nimahsela, chutiang hun a lo thlen pawh chuan dam leh ngei a tum tlat a, chung harsatna leh manganna te avang chuan intihbuai a tum lo va, mittui karah pawh Lalpa hruaina ringin chatuan thlengin kal a tum ta zel zawk a ni.