Aizawl : Tuiphal leh Tuithil phai leileta Ngopa, Lamzawl leh Pawlrang khua te thar, Dawnfawh lian chi chu vawiin khan Mizoram hmun hrang hrangah phurh thlen a ni. Naktuk hian Aizawlah chuan Horticulture office ah hralh a ni dawn a, Serchhip lamah pawh heng Dawnfawh te hi hralh theih turin phurh thlen a ni.

Tunhnai khan Saitual DC,  Vanlalhruaizela Khiangte hovin LPS leh DDK palai te chuan helaia kuthnathawktute hi Ngopa bakah helaia Dawnfawh ching khaw pahnih hi an han tlawh a, Lockdown boruak nen, helaia Dawnfawh thartu te chuan a hralhna lamah an thlaphan thu an lo hrilh a ni.

Saitual DC hian hma lak sak nghalin, bialtu MLA pawhin sawrkarah hemi chungchang hi a lo thlen tawh bawk a, rang taka hma la nghalin  Horticulture lam chuan a buaipui hna hi an thawk nghal a ni. 

Ngopa leh a chhehvel khua te Dawnfawh thar hi a lo berah pum 65000 chuang a ni dawn a, quintal 2500 chuang zet an thar tur thu ZALEN thudawnna chuan a sawi.