Zote Entertainment chuan an fachuam Ruthi Chenkual chu Mizo actress awm tawh zinga hlawh hnem ber ni turin inremna an ziahpui ta. An inremna ang chuan Ruthi Chankual hian Rs. 2,50,000/- bakah, Application atanga an sum lakluh atangin 10% a chang dawn - hei hi a hlawhtling thei a nih chuan Mizo film bika actress hlawh hnem ber tur nia hriat a ni.

Zote Entertainment hian film thar an buaipui leh mek a, hemi atan hian vawiin June 20, 2024 (Ningani) khan Lersia Play te nen inremna an ziak. Zote Entertainment leh Lersia Play ten thawhhona thuthlung an ziah rual hian, an film siam tura a changtu turte pawh inremna an siampui nghal a ni. An film thar tur hi 'LERLAWRI (i ngam ngam ka ngam)' tih a ni a, hmalakna ngawrh takin an kalpui mek a ni. 

'LERLAWRI (i ngam ngam ka ngam)' film-ah hian Ruthi Chenkual leh Hriatpuia Kion ten min role an play dawn a, lemchan khawvelah kan lo hmuh fo tawh thin - Nu Machhungi leh Parteii (Lerlawri) te kan hmu dawn bawk a ni. Romantic leh comedy inpawlh a ni dawn a, Mike-a'n a direct leh dawn a ni. 

Ruthi Chankual leh Mike-a te hian ni 14 chhung atan Rs. 2,50,000/- hlawh tur bakah, 10% share nei tur hian inremna hi an ziak ta a ni. Mike-a chuan, "Mizo actress awm tawh zinga hlawh hnem ber tur niin kan hria a, a phu kan tiin kan lawmpui khawp mai," tiin a sawi. 

Ruthi Chankual hi Entertainment Society of Mizoram (ESM) buatsaih Mizo Film Award 2023-ah khan Best Supporting Actress atan thlan a ni a, kumin kum tir lam khan MFDS leh I&PR Department tangkawp ten Mizoram Film Award 2024 an buatsaih a, Best Actress atan thlan a ni leh bawk. 

Tunlai entertainment huangah chuan Mizo film industry aia thangduang a awm lo ti ila kan sawi sual awm lo e. Film siamtute leh a changtute sum lakluh pawh a ziawm chho ve ta zel a, top actor/actress te phei chuan film pakhatah nuai chuang an hlawh ve ta fur mai.