Mizo Film Award 2024 sem a ni ta : 'Thih Leh Dam' a chungnung ber, Best Actress Sangsangi

Entertainment Society of Mizoram (ESM) buatsaih Mizo Film Award 2024 chu Zirtawpni zan khan Dawrpui Multipurpose Centre-ah sem zawh a ni ta a, Conflate Video production kutchhuak 'Thih Leh Dam' chu film tha ber 'Best Film' atan thlan a ni.

Hetih lai hian mipui ngaihven ber pakhat Best Actress category-ah tun lai actress tha ber ber zinga a tha ber atan Sangsangi thlan a ni. Sangsangi hian 'Rini Leh Rina' film hmangin he chawimawina hi a dawng a, lawmthu a sawi laiin a insum zo lo hial a ni.

Thih Leh Dam chu hei le!

Mizo Film Industry-ah Leitlangpui lamin an thawh hlawk thin a, kuminah pawh an thawh that zia hmuh theihin a awm leh ta. Conflate Video Production te kutchhuak 'Thih Leh Dam' chu film mala award la hnem ber niin, award pathum a hlawh chhuak. An director B. Lalbiakvela (Bv-a) chu Best Director atan thlan a ni a, Best Screenwriter a la tel bawk - Thih Leh Dam film en tawhte chuan a phu zia kan hre awm e.

Director tha tak tak kan nei ve nual ta a, Mizo Film Award hmasa berah khan Mapuia Chongthu hnenah hlan niin, nikum khan Drew Pachuau kutah hlan a lo ni tawh bawk. Kuminah Bva hun a her chhuak ve ta a, a kutchhuakin Best Film a lak bawk avangin a lawmpui awm tak zet a ni. Bva hian nikum khan Best Screenwriter a lo dawng tawh bawk a, he chawinawina hi kum zawnin a dawng ta a ni.

Mapuia a theu neu lo

Mizo film awm tawh zinga budget sanna ber an tih chu Ambush hi a ni a, film dangte aia a thatna pawh sawi tur a awm nual awm e - a siamtu chu Mapuia Chongthu (Leitlang Pictures) a ni. Chung zinga langsar tak chu a sound design kha a ni a, a film tihmuhnawm zualtu pawh a ni. Best Sound Design category hi kumin atanga telh thar a ni a, Ambush hian award hmasa ber a hlawh chhuak ta a ni.

Ambush film-ah hian sipai lema chang thiam zet mai a awm a, a hming chu Eddie Tochhawng a ni. Film dangah pawh tha takin a chang thin a, Best Supporting Actor award a hlawh chhuak ta nge nge a ni. Ambush film en tawhte chuan a phu zia kan hre mai awm e.

Mapuia Chongthu kutchhuak Ambush hian award pahnih a hlawh chhuak. Hei mai hi a la ni lo, a kutchhuak dang Hrehmun Shortcut pawhin award pahnih a hui - a kutchhuakin award pali a hlawh chhuak tihna a nih chu. Hrehmun Shorcut hmang hian Mapuia hian Best Cinematographer award a la a, a changtu zinga mi Makima Chawngthu chu Best New Actor In A Leading Role atan thlan a ni bawk.

Mipui duh ber Kan Chhungkua

Mipui vote hmanga thlan People's Choice Award chu rin lawk ang ngeiin In-House Production ten an la leh ta. An film hit zet mai Kan Chhungkua hmangin award hi an la a, kum zawnin he chawimawina hi an dawng ta a ni.

Kan Chhungkua hian a thawh hlawk hle a, a changtu Maruata Rawite chu Best Actor atan thlan niin, a chanpui Olivia Lalnunpuii chu Best New Actress In A Leading Role atan thlan a ni bawk - In-House Production kutchhuakin award pathum lai a hui.

Keimi

Application leh YouTube lamah chuan a lar ber a ni lo mai thei, mahse Keimi hi a lo namai lo hle. Best Costume Design award a hlawh chhuak a, tunah hian a pahnihna an shoot leh mek bawk.

Dear Kim pawhin Best OST a la a, a satu chu tu dang ni loin Young Fella a ni. Young Fella hian OST a sa hnem tawh hle a, lar tak tak vek an nih bawk avangin award dawn phur ber pawh a tih theih hial awm e.

Mike-a kutchhuak Two Wheeler Taxi Driver pawhin award pakhat a hlawh chhuak a, Maneihi Fanai chu Best Supporting Actress atan thlan a ni. Hetih lai hian category thar Best Documentary lamah pawh Napoleoon R.Z Thanga a langsar a, a kutchhuak 'A Star Is Born' hmangin Best Documentary award a dawng a ni.

Best Actor Maruata Rawite

"Papui tun tum chu ka lo kawl ve lawk ang aw" tiin Maruata Rawite chuan a lawmthu sawinaah a sawi chhuak. Hei hian awmze thui tak a nei a, Mizo Film Award 2023-a Best Actor award dawngtu Papuia Pachuau a kah letna a ni. Papuia hian a actor puite chu tang sauh sauh turin a fuih a, Best Actor Award lak zel a tum thu a sawi bawk a nih kha.

Kuminah Maruata Rawite hun a rawn her chhuak ve ta a, a thianpa Papuia a kap let ve sak! Maruata thusawi lai hian Papuia hian 'standing ovation' a lo pe a, thiantha tak an nih zia leh an induhsak tawn zia an pholang.

Sangsangi hun a thleng

Pa Hausa film atanga Zoram mipuiin kan hmel hriat, tun lai thalaite star rawn Sangsangi hun a her chhuak ve ta. 3rd Mizo Film Award 2024-a mipui rilru hneh ber pakhat a nih a rinawm a, award a dawn avanga lawmpuitute au thawm pawh a tha hle. Rini Leh Rina film-ah khan Francis-a nen an chang dun a, he film hmang ngei hian Best Actress award hi a hlawh chhuak ta a ni.

Sangsangi hian award dawn a lo inbei sei chiah lo nge result an puan chhiah khan a hamhaih tih hmelah a hmuh theih a, lawmthu sawi tura a ding chhuak pawh a zam hle. Mipuiin kut bengin an lo lawm a, tha takin lawmthu a sawi zui a ni.

3rd Mizo Film Award 2024 hi Pu Lalnghinglova Hmar, Minister of State chuan khuallian niin a hmanpui a, award a sem ve bawk. Award hlantute hi tun laia kan milar leh chhuanawm ber berte an ni hlawm a, award ceremony a tiphuisui hle.

3rd Mizo Film Award 2024 Winner

1. BEST ACTOR

~ Maruata Rawite Kan Chhungkua

2. BEST ACTRESS

~ Sangsangi - Rini & Rina

3. BEST SUPPORTING ACTOR

~ Eddie Tochhawng - Ambush

4. BEST SUPPORTING ACTRESS

~ Maneihi Fanai - Two wheeler Taxi Driver

5. BEST NEW ACTOR IN A LEADING ROLE

~ Makima Chawngthu - Hremhmun Shortcut

6. BEST NEW ACTRESS IN A LEADING ROLE