Mizo Film Award sem a ni dawn

zalenxhg - Nov 28, 2021

Mizo film industry hmasawnna chuan rah duhawm a chhuah chho mek zel a, an pualin award hial sem a ni dawn ta - December thla hian Mizo Film Award (MFA) chu sem a ni dawn.

Mizo film industry hmasawnna chuan rah duhawm a chhuah chho mek zel a, an pualin award hial sem a ni dawn ta - December thla hian Mizo Film Award (MFA) chu sem a ni dawn.
MFA atan hian inbuatsaihna ngawrh takin kalpui a ni a, a vawi khatna tur a nih avangin a tha thei ang bera buatsaih tumin theih tawp chhuah mek a ni. Award sem turah hian category engzat nge awm dawn final a la ni lo a, hun reiloteah a chiang thei turah beisei a ni. 
Award dawng tura chhawpchhuahte hming puan a nih hnuah mipuiin vote hmangin an duh zawng an thlang thei dawn a, hei hian Mizo Film Award hi a tihlu zual dawn - social media lamah vote thlak theihna hi phochhuah thuai a ni ang. 
Mizo film industry hmasawnna hmuh hmaih rual a ni lo, a zuanin a zuang a ni ber. Hripui len hnuah pawh Mizo film chhuak thar ber berte chu online-a en theih turin chhawpchhuah a ni a, mahni in lum a tangin man chawiin a en theih. Hei hian sum leh pai lakluh kawngah film siamtute nasa takin a pui a, Mizo film industry tan hmasawnna rahbi pawimawh tak pakhat a ni. 
Mizo film industry-in hma a sawn theih nana theihtawp chhuah thin - film siamtute leh a changtute puala award hial buatsaih a ni tur hi a lawmawm a, Mizo Film Award pawhin ngaihhlut a hlawh chho zelin a rinawm. 
Mizo Film Award 2021 hi Tlau Entertainment buatsaih niin, kum dangah pawh sem chhun zawm zel turin ruahmanna siam a ni. Kumin hian Y.K Company chu main sponsor an ni a, midang thawhpui eng emaw zat an nei bawk. 

Share now