Mizo Film Award sem a ni ta
'Dengi I love You' a ropui ber
Tlau Entertainment buatsaih Mizo Film Award 2021 chu nizan khan Vanapa Hall-ah sem a ni a, 'Dengi I Love' chuan award pali ngawt a hlawh chhuak. Mipui ngaihven Best Actor leh Best Actress-ah Papuia Pachuau leh Rosangpuii Ralte ten award an la a, Best Director chu tu dnag ni loin Mapuia Chongthu a ni. 
Dengi a hit!
Nomination puan a  nih atangin boruak a nei nghal hat a, a takah pawh a che tha hle chiah. 'Dengi I Love You' star K. Vanlalawmpuia chu Best Supporting Actor atan thlan a ni a, Best Supporting Actress dawngtu pawh a chanpui Melissa Lalmuansangi tho a ni. Melissa Lalmuansangi hian kum naupangte ni chungin Mizo film industry-ah hming a chher nghal thei a, hmabak eng tak a nei a tih theih awm e.
A la tawp mai lo, Best Cinematographer atan Ngaihawma Fanai chu thlan a ni ve leh. Ani hi 'Dengi I Love You' a hlawhtlin  theih nana mi pawimawh ber tih ngam  ani a, award a dawng pawh hi a mak lo. Film Award-a an ngaihhlut em em thin Best Picture pawh 'Dengi I Love You' hian a dawng a, film tha tam tak zinga a rawn invawrh hian a lar em em chhan kha a rawn pholang a tih theih awm e. 
Best Actor & Actress
Film lamah nasa takin hma kan sawn a, a changtute pawh 'celeb' tia sawi theih an ni der tawh. Best Actor leh Actress dawngtute pawh hi thalai zingah chuan hre loa an awm awm lo e - Papuia Pachuau leh Rosangpuii Ralte te an ni tlat. 
Papuia Pachuau hi 'Hnehtu' film-ah khan a changtupa ber a ni a, a chanthiam zia sawi nawn a ngai lo - mipui vote atangin a hriat theih. Papuia hi - Thingtlang Tlangval, Scooty leh film dang eng emaw zatah a inlan tawh a, tunah chuan lemchan thiam kan neih that ber zinga a mi a ni. 
Rosangpuii Ralte sawi tawh chuan mipa lam an lawm thin, a hmel that bakah lemchan a thiamna hian sang takah a vawrh. Best Actress atana thlan a nih thu puan a nih pawhin mipui thawm a tha hle a, a phu ber tih hai rual a ni lo. 
Mapuia chu hei le...
Mizo film industry-in hma a sawn theih nana thawh hlawk berte zinga mi leh, bung thara hlangkaitu tih ngam Mapuia Chongthu chu Best Director award hlan a ni - a phu e. 
Best Director a dawnna hi 'Nunna Thar' film kha a ni a, a hun laia a lar zia sawi nawn a ngai lo. Kha tih hun lai khan film award sem ni ngat phei se chuan hei ai hian a ropui leh zual ngei ang a, mipui vote pawh a hmu tha leh zual ngei ang. 
'Nunna Thar' kher kha chu Mizo film industry-in bung thar a kaina leh, mipui nawlpuiin film an ngaihven zual chhoh tanna ti pawhin a sawi theih awm e. Mapuia kut chhuak a nih tawh chuan mipuiin beiseina sang tak an nei thin a, hei hian Best Director chawimawina dawn a phu zia a tichiang viau awm e. 
Mapuia Chongthu kutchhuak dang 'Last Wish' chu Best Short Film atan thlan a ni bawk, mimala langsar ber zinga mi a ni. 
Thingtlang Tlangval
A hun lai khan mipuiin an en nasa a, tahpui ta hialte pawh sawi tur an awm fo a nih kha. A story ngaihnawm leh lairil fan zet mai ziaktu Malsawma Lailung chu Best Screenwriter atan thlan a ni a, a phu tih loh rual a ni lo. 
Chutih rualin he category-a hming chhawpchhuahte hi an hrawl hlawm hle a, chawimawina dawn phu tak tak vek an ni. B. Lalbiakvela (Damna Kim), H. Zosangliana (Nunna Thar) leh Nuna Hrahsel (Comrades) te an ni a, tu mai pawh hian Best Screenwriter hi an phu ti ila kan sawi sual awm lo e. 
Mizo Film Award ceremony hi dar 7:00-ah Red Carpet atangin tan a ni a, dar 8:00 atangin show hi LPS leh Zonet bakah, YK Official channel-ahte live-a pekchhuah a ni a, mipuiin an hlutin entu pawh an thahnem hle a ni.  
Zaithiam pawh eng emaw zat an inlan a, Adama leh Sangtei Renza ten lawm an hlawhin boruak an siam hle. Anni bakah hian -  Zorema Khiangte, Hlimhlimi, Arini, Kimkima leh Siampuii Ralte te an zai bawk.

MIZO FILM AWARD 2021 WINNER
• Best Actor - Papuia Pachuau (Hnehtu)
• Best Acctress - Rosangpuii Ralte (Thingtlang Tlangval)
• Best Supporting Actor - K. Vanlalawmpuia (Dengi I Love You)
• Best Supporting Actress - Melissa Lalmuansangi (Dengi I Love You)
• Best Director - Mapuia Chongthu (Nunna Thar)
• Best Cinematographer - Ngaihawma Fanai (Dengi I Love You)
• Best Screenwriter - Malsawma Lailung (Thingtlang Tlangval)
• Best Picture - Dengi I Love You!
• Best Short Film - Last Wish