Thla tam pawh la liam lo kal ta khan Mizoram khawchhak tlangdunga awm, Chawngtlai khua chuan Mizo lalte thlangtla zel tur titawp a,pawih ral lo tlawmtu nia kan ziaktu hmasate leh Mizo Historian-ten an sawi an lal Nikuala’n thil chi hrang hrang a lo hnuchhiah,an sulhnu hmun hlui tam tak la awmte leh an khaw rohlute chawi lar na ni fawmin, Chawngtlai khua chu “Mizo Historical Village” ah Zoram mipuite hriat turin a puang rup mai a. Hetianga ‘Mizo Historical Village’ meuh han puang ta chu,mi tam takin Chawngtlai khua an ngaihven thar phah a. Chawngtlai khua hi an puan ang hian ‘Mizo Historical Village’ tia han vuah em em tur chuan an phu reng em? tiin an belchiang ta zut zut mai. Hetianga mi tam takten an rawn belhchiana an hlutpui em em lai hian lawmpui ahnekin mi thenkhat zingah helh fefe an lo awmve bawk a. Heng mite hian Chanchinbuah te leh Facebook lamah te, “Chawngtlai mipuite hian tun hnaiah heng an hmun hmingthang an tihte hi an phuahchawp mai mai a ni. Henglai tlangdung khuate pawhin hetiang hi an nei tih reng reng kan hre lo. Hetiang hi ni ta tak tak se hman hmanah khan hriat a hlawh daih tawh ang?” tiin beih a tawk ta fo mai. Mahse, Chawngtlai khaw rohlute belhchian leh thil tak tak a ni em? tiin belhchian leh hriat chian tum si lo hian ralkhat atanga chiang inti takin ansawi thin a. Heng an sawiselna avang hian belchiang chak leh hluttu a nei tam tulh tulh thung. ‘Sahlam’ (Milu khaina) leh Mizorama Lungphun sang ber chauh tlawh tur pawh hian kal an insul pel ta zut mai. An dil loh lam atangin malsawmtu in malsawmna tam takin a vur phah ta a ni. DAWT PHUAHCHAWP A NI ANGE'M ? Mahni khua chawilar nana khawilai hmun hmun emaw samfai bawrh bawrh a phuahchawp kual vel mai mai hian, Mizo mipui zawng zawngte hi dawt hlawm hlak hmangin Chawngtlai khua hian a bum duh dawn em ni? Mizo mipuite dawt mai mai hmanga an bumkual a nih chuan Mizo mipuite hian Chawngtlai khua hi engtikah mah a tha zawngin kan hre leh ngai tawh lo vang. He khuaah hian Pathian ringtu tha tak tak khel lova Lalpa faka lam an awm reng a, hei mai bakah hia Upa te leh Pastor te an awm ve si a. Heng mite hian dawt chu an sawi lul lo vang? Dawt sawi lo ni ta tehreng pawh nise, an Pathian rin em em aiin Chawngtlai mipui tam tak ten dawt sawi turin sualah thiam takin an thlemthlu tihna a ni ang? Hei hi lo dik ta se Upa te, Pastor te, Mi hlimte hian an hlim chhan leh a rawng an bawl thin Pathian nung ai hian, Chawngtlai mipuite an hlau zawk dawn tihna a ni. Chawngtlai khua hian Zoram mipuite hi min tihder pawh ni ta tehreng se, dawt a ni tihlanchhuah hun a awm leh tho dawn si a. Chuvang chuan Chawngtlai mipuite hian Zoram mipuiten dawt ansawi a ni tih an la hre ngei dawn a ni tih hi an hmu lawk ve ngeiin a rinawm a, dawt hmang ringawt chuan Zoram mipuite hi a bum thei dawn em ni? Heng Chawngtlai khaw chan tur kan sawi angte hi Mizo Historical Village-a puan a nih theih nana a hnarkaitu, an khawchhuak pawl Chawngtlai Welfare Committee, Aizawl te hian an hmu pha lo a nih chuan, mi mawl tawp hruaitu tlak lo leh dawt sawi pawh hreh lo tiin diriam an ni ngei ang. Heng an chantur chiang sa lang rengte avang hian,tunhnaia dawt hmang ringawt a phuah thar hmang ringawt rinchhan hi chuan, “Mizo Historical Village” ah hian engti kawng zawng mahin an inpuang ngam lul lo vang. ‘MIZO HISTORICAL VILLAGE’ MONUMENT A AN TARLAN THENKHATTE. ‘Mizo Historical Village’ an intih nachhan, an Guide Book siama hmun tam tak an phochhuah zing a Zoram mipuite tan a hlut awm ni phaka ka hriatte chu; Lal Nikuala In hmun hlui, Sahlam (Milu khaina), Tawlhloh Puan, Pasaltha Hranghleia Tawlhloh Puan, Pasaltha Hranghleia Feikibar, Hmar Lungtat, Hranghleia Thlan, Chawngtlai Thing Pangpar, Ramhuai te chenna nia ansawi Khawpui Tan Tlang leh a puk, Nikuala inthawina thin nia an sawi, Mizoram Thingtlang Thlanmual hmasa ber, Lal Lung dawh, Hrang Lung, Nikuala runtu Vaiho riahna (Vai riah hmun), Mizoram Lungphun sangber, Lungsen (Ai enna Lung), Mizorama nau hual/Nau lawm tichhuaktu Biaklawma Lungphun, Mizoram kham mawi ber pawl nia ansawi .(Paranga pa tanna Puk/Kham), Lung ding (Mau ler chen ni a ansawi), Sakhi Leilawn (Kawra Lung inkham kai),Lung lei/Lung Leilawn, Tui far, Pastor hriat hlawh leh lar hmasa,Pastor Kaplunga Damlai Lungphun, Pasaltha Hranghleia fanu tuna la dam Hmingliani. Vahlah Lunglen Tlang. Etc. Hengte hi an Guide book a an ziahlan thenkhatte an ni a. Heng an rohlu ka han tarlan hlutawm tak takte atang pawh hian ‘Mizo Historical Village’ a an inpuang hi thil awm lo em em chu a ni hran lo. Heng Historical Village Guide book-a lo langte hi hmanlai atanga rohlu an lo neih tawh leh pi pute atanga hming an lo phuah tawh, khaw miten a chanchin an sawi fo thin, Zoram mipuite hriat tham khawp tura tun hma lama phochhuah ngaihna an hriat si loh, an phochhuah har avanga khaw mite pawhin hlut em em nachang an hriat loh thil hlui leh an hmun hmingthang tak takte a ni ang tih hi rinhlelh rual a ni lo. Heng an ro hlu leh an hmun hmingthang neihte hi kan Mizo History-ah hmun pawimawh a changphak a ni tih, an khuaa lehkhathiam lo chhuak tharten an han hmu thiam chho ve ta a, chutiang rohlu tam tak Zoram hmun hrang hranga hmun hmingthang leh rohlute aia nep bik chuang lo, a nihna te hre rengin, ngaihtuahna fing tak hmangin ‘Mizo Historical Village’ hial phu nia inhria-in,huaisen takin ‘Mizo Historical Village’ ah hian an inpuang a ni tih hi a chiang em em a ni. Chawngtlai khuain hetiang ang title an inpe ngam hi an fakawm mai bakah a huaisen thlak hle bawk a. Huaisen taka an hmalakna te leh an thawhrimna rahte avangin malsawmtu kan Pathian pawh hian malsawmna tam taka vurin, a hlawhtlinna an hmu chho mawlh mawlh a, Zoram mipui tam takten Chawngtlai khua tunhma lama eng hehu-a kan ngaih loh chu kan ngaihven thar ta em em mai a ni. Mipui nawlpui maiin an ngaihven lo va, Chanchinbu mite pawhin an ngaihven a, ‘Mizo Historical Village’ an puan niah phei chuan Zoram chhung Media hriat hlawh ber ber mi sawm chuang laiin an hmanpui hial niin an sawi. Hetiang khawpa tam Media mite an han koh kal theih dan atang pawh hian an tumah an hlawhtling sa tawh reng a ni. Tin Zoram khaw hrang hrang tun hma lam atang a, an rohlute phochhuah nachang lo hre hmasa khuate tan chuan helhkam lian ber leh thik tham khawp a ni lo thei ta lo va,heng avangte hian an thil tih lo helh em emtute tan chuan Zoram mipuite rinhlelh theih tur zawnga an sawi mai pawh hi a mak lem lo ve. Tun atang chuan Zoram mipuiten Chawngtlai hi kan hre reng tawh ang a, hei mai ni lo hian Chawngtlai khaw thil tih avangte hian Mizoram khaw hrang hrangten mahni khua tihlarna kawngah tan kan lak thar nasat phah a, Press Conference an neihna leh TV leh chanchinbu hrang hranga an puandarhtir hnua an hmachhawp ropui tak mai leh hmalakna thui tak an lo kalpui tawh ‘PASALTHA MUAL’ te pawh khaw pakhatin an sawi eng atangin, Official takin an han puan khalh daih mai a tang ringawt pawh khan, he khaw thil tih hi a nep lo va, Mizo mipuite tan chuan fak an phu thlawt a ni. Chawngtlai khua hi Mizo mipuite hian mahni khua chawilar leh mahni khaw rohlute hlutna kawngah Zoram khaw hrang hrangte harhtharna min pe a, min tipiangthartu tiin kan hre reng tawh ang. - Buangpuia Pa, Chanmari, Aizawl