ZALEN September 09, 2026 : Nimin khan central government chuan Naga Advocate Nchumbemo Mozhui leh Mizo Judicial Officer Helen Dawngliani te chu Gauhati High Court Additional Judge atan ruat an nih thu a puang.

Supreme Court Collegium chuan August 18 khan Advocate Nchumbemo Mozhui leh Judicial Officer Helen Dawngliani te hi High Court Judge atana ruat tura rawtna a lo siam tawh a, sawrkar chuan nimin khan Judge atana ruat an nihna hi a hriattirna (notification) a tichhuak.

Helen Dawngliani hi May 24, 2011 khan Mizoram Judicial Service hna a zawm a, thiamna lamah BA(Hons) LLB a ni bawk. Additional District & Sessions Judge hna hi Aizawl leh Lunglei District Court-ah a lo thawk tawh a, Gauhati High Court-ah registrar ni tawhin, Secretary to the Government of Mizoram, Law & Judicial Department (April 2021–July 2024) hna a lo chelh tawh.

Government Advocate-cum-Additional Public Prosecutor hi Gauhati High Court, Aizawl Bench-ah a lo thawk tawh bawk. Mizo zinga hmeichhe High Court Judge kan neih hmasak ber Marli Vankung in kumin ni March ni 3 khan a retire hnu-ah a pahnihna atan Helen Dawngliani hi hmeichhe High Court Judge kan neih leh hmasak ber a ni

Heleni hi a experience leh a thiamna lamah Mizo te zinga Judge lo awm tawha tawn hriat ngah ber a ni a. Dikna humhim nana hetiang khawpa mithiam High Court judge a ni tur hi a lawmawm tak zet a ni. A pasal Haulianthanga pawh hi advocate experience tha tak nei a ni a, an chhungkua-in Ramhlun, Aizawlah an cheng mek (www.jclalnunsanga.in)