ZALEN, November 01, 2025: Zirtawpni zana Mizo Idol Show-ah Super Trio hla chuam, ‘Dai ve rawh le’ tih chu Idol star pathumin an sa chhuak a, sawi zui a hlawh a. Super Trio pawh an lawm a, an hmuipuipu, Robert Lalduhzuala chuan ‘sermon tluka an ngaihhlut’ hla hi an phuahna rilru sa chhuaka a hriat thu a sawi.

Robert-a hian LESDE Mizo Idol Season 8 buatsaihtu, Zonet-in an YouTube-a Idol star pathum - Vanlalneihpuii, Lalthakima leh Emmanuel Lalremruata ten an sak an dah chhuah a comment-naah thangthar zaithiamten an thianho hla an sa chhuak chu lawmawm a tih thu a sawi a, ‘a thiam pawh inthiam tak zet e,’ a ti.

An phuah dan sawi chhuakin, “Tawngtaia kan dil chhuah, sermon tluka kan ngaihhlut hla a ni ve a, a ngaithlatute leh a satute tan ngei pawh Lalpan malsawm rawh se,” a ti.

A satute hming lam chhuakin, “Neihpuii zaiin min khawih hle mai, a nung tlat!,” a ti a. “Thakima leh Em-a pawhin an sa tha em em e... Kan phuahna rilru in rawn sa chhuakin ka hria,” a ti.

‘Dai ve rawh le’ hi Super Trio-in mipui hmaa an sak chhuah hmasak ber chu kum 2012-a Thenzawla KTP General Conference tawp zana variety programme-ah a ni a, sak chhuah a ni leh chu Robert-a hian a lung a tihlen thu pawh a sawi a, “Kan phuah lai boruak te, kan sakna hmasa ber te min ngaihtuah chhuahtir a, lung a leng tak zet,” a ti.

Super Trio hi Robert-a bakah a thiante pahnih, Vanlalsailova leh Joseph Zaihmingthanga te an ni a, Joseph-a hian May 7, 2023 khan a thihsan tawh nghe nghe a. “Joseph-a a ngaihawm hle mai, hmu ve se a va lawm thiam leh dawn em!” tiin a thianpa hian a comment-ah tel nghe nghe.

Super Trio hi 2000’s tir lama mi mal theuhva Mizo lengzem khawvela lar chhuak, a hun laia ‘a ber’ tih ngam vek an ni a, inkawmngeih tak niin Pathian fakna hla chauh sa tawh tura inpe zui an ni a. Pathian pawhin a hmang a, zai bakah thuhril rawngbawl tura sawm hlawh ber ber an ni zui.

Robert-a bik phei hi chu Mizorama kohhran thalai pawl lian ber, KTP-ah central committee member term hnih niin tunah hian Ramthar North Kohhranah Tual Upa a ni mek bawk.

“Neihpuii, Thakima leh Emmanuel-a te trio hian hriat reng a hlawhin a rinawm. An zai thiam a ni satliah lo va, a nung a, anmahni pawh an cheng niin a hriat theih,” a ti a. “A hmuna awmte leh platform hrang hranga lo thlirtuten an en nawn châk fo a rinawm,” tiin a comment hi a khar a ni.