ZALEN October 24, 2025 : Mizo idol Top 10 intihsiakna Ningani zan dar 8-ah, R. Dengthuama Hall-ah mipui chhim theihin neih chhunzawm a ni a, mipui hlut a hlawh nghal hle. Thawm nei lian ber Tuikual South tlangval Emmanuela a zai ṭha in mipui läwm a hlawh. 

Fans group lam pawh banner nen an thawkchhuak tan a, fans nei tha pawh a hriat viau. Top 20-a thlah tak Chaltlang Lily nula, Lalhruaisangi leh Vairengte tlangval Lalchhuanmawia Saivate te a rawn inlan leh a ni.  

LAWMSANGSZUALI, Shillong – Ngaihno a bei_

Lawmi hian Johana hla mawi tak, Chhhingmitthla hmangin Mizo Idol Top 10 intihsiakna bul a tan a, a zai thain a inthuam dan leh stage zawng zawng nen pawh a inhmeh hle. 

LALDINSANGA, Upper Repbulic - A che bawn!!_

Hmangaihi hla thar, ‘Tleitiri’ nen Dinsanga a rawn inlan a, stage lian a ngam nghal hle, stage a luah zoin a experience neih tawh a hmang tangkai hle. Judge hnaih theih ang berin a zai khum ál ál ngam nghal tlat!! Mipui pawh a thap tha hle mai.

ZOMUANSANGA, Dawrpui Vengthar - Zomuana tak tak kan hmu tan em? 

Albatross hla, I tello chuan hmangin Zomuana a rawn inlan a. Stage performance nei vak chi a ni lo nain, a zai erawh a perform tha hle. 

REMLALVUANI, Thenzawl – A chet that loh ber zan?

Mizo Idol bultan atanga thawm nei lian, Thenzawl nula Vuani’n Chhingkhualah bawk tih hla, Pu Lalremruata phuah a rawn sa a, a bultannah a inthlahrung hret em aw tih turin a rawn dim viau a, a aw a inkheh chho a, a zai tha zui viau. Zan dan ang bawkin mipui lawm pawh a hlawh hle.

VANLALNEIHPUII Chamring - Damna kim.

Zan dang ang bawkin a zai tha, a zai a nghet a, a pui leh hle bawk. A hla pawh a sa hneh leh viau mai. Hmingtea’n a a hniama a aw a nalh thu a sawi nasa hle a, a thu lam a fiah thain, a hla thuin a sawi tum a sa chhuak thiam niin a sawi a, a hla thlan fuh a tihzia a sawi nasa hle. 

EMMANUEL LALREMRUATA – Mizo Idol changtupa?

Mizo Idol-a thawm nei lian ber, Emmanuela’n R Dengthuama hall-ah fans a chhawm hnem hle a, hall chhungah an thawm a tha hle. Intihsiak tam tak lo hmachhawn tawh a nih bakah a inbuatsaihna a tha a, boruak a ngamin a zai pawh ngaihthlak a hahdam hle. Amah aiin a fans te hi an inpuahchah nasa zawk em aw, tihtur khawpin a fans te an tang a.

MARIA LALHRIATZUALI, Chhinga Veng

Mizo Idol Top 10 zingah Gospel hla sa an tam lo a, fakna hla satu 2 zinga Chhinga Veng nula, Maria-in, Opa (Tribal Power) hla, Mamawh chhanna a rawn sa ve leh a, Gospel hla sa ho hian an hnehin an hla sak an zo theih vah vah khawp mai. 

EUNICE ROSANGPUII, Kolasib Venglai – A trang ulh emni?

Zang danga ngaihnobei leh lungrun taka zai thin, Eunice-i hi, a hla thlan a fuh tawk lo deuh em? Elizabeth Zodinpuiin mawi taka a sak thin chu Valmawi tih chu, muang no nalh takin a rawn siam danglam a, judge te beng a fah zo lo deuh niin a lang thung. Zai thiam, aw mawi an tih thu an sawi vek nain, a hla leh a sak danah duhkhawp lo a nei niin a lang.  

SYLVIA MALSAWMPUII - A liam mai dawn ami?

Champhai nula hmeltha leh zai thiam, Sylvia-i hun a inher a, Hmangaiha hla, ‘Ka liam ange’, tih hmangin ‘risk’ a rawn la tih a chiang. Top 50-ah a zai sual a, chuti chungin Top 20-ah a tling a, hei hian mipuiah Slyvia-i tan leh tan lo a then phawk niin a lang a, sawizui a hlawh hle. Top 10 intihsiakah a che chhe lutuk lo nain, Judge-te comment kalhmang a inang. Sylvia-a hian min liamsan tawh mai angem?’ tih ngaihtuah zui theih tak a ni.

LALTHAKIMA – Viewer WILDCARD hmangin chhan a ni angem?

Mizo Idol Top 10 intihsiak a zai tha ber tia sawi ngam, Mamit tlangval, Thakima’n HOM hla, Herleri hmangin a tawp a khar a, a zai that bakah a performance a thain a hmuhnawnawm hle. Mahse, a thunawn luh hmain a hla thu a theihnghilh hlauh! 

Mizo Idol buatsaihtute chuan an social media hrang hranga (Zonet facebook, youtube leh Instagram) a entu ngah ber chu round sang zawka inhlangkai nghal tur niin an sawi. Hemi awmzia chu, mipuite hian an duhzawng emaw, an chhan duh emaw chu views hmangin round sang zawkah an hlangkai thei a ni.