ZALEN, Apr. 09, 2026: Mizo Inchai Title Fight Palaihawl champion lai, Remruatpuia chu Mamit tlangval, Ramropuia nen kawnghren inchuhin an inhmachhawn dawn ta.

Palaihawl kawnghren kawl mektu, Bethlehem Vengthlang tlangval hi Ngursangzuala nen inchai tura tih vek a ni tawh a; mahse, Saitual tlangval hian rokhawlhna lian tak a neih avangin a inhnuk dawk a, champion lai chotu tur thar zawn a ni.

Mizoram Wrestling Association (MWA) buatsaiha Mizo Inchai Title Fight Palaihawl champion lai chotu tur zawnna hi Ningani khan Ramhlun Sports Complex Wrestling Hall, Aizawlah neih a ni a. Champion lai chotu tura inlan mi pathum zingah kum 33 mi, Mamit tlangval chuan Zoremmawia, Kolasib chu round thumah vawi thum a bawh bet a. VL Remmawia, Kolasib pawh round thumah vawi thum tho bawh betin a chungnung ber a ni. 

MWA chuan October thla khian LPS Arena, Falkland, Aizawlah Mizo Inchai Title Fight buatsaih leh dawn a, hetah hian champion lai leh a chotu hi inchai tur zingah an tel a. Title Fight atan hian Zirtawpni hian LPS Office-ah inremna ziah a ni ang.