Aizawl March 16, 2024 : Saitual naupang Samuel Lalbiakhlua, kum 11 S/o MS Dawngzuala, chu tukin khan khawvela Paragliding zirna sang ber dawttu Bir-Billing, Himachal Pradesh hmunah thlawkin tha takin a tum thei a. Hriat theih chinah khawvel huap pawhin hetianga thlawk thei naupang ber a nih beisei a ni.

He hmuna zir tur hian kar hmasa Inrinni 9.3.2024 khan Mizoram chhuahsanin Himachal Pradesh-a Bir-Billing hmun an pan a, Pathianni atangin thlawh zir tanin kar khat pawh a zir tlin hmain tukin Inrinni zing khan a vawikhat nan a thlawk chhuak a, buaina leh harsatna awm lovin leiah tum a ni. A chanchin hian ngaihven a hlawh nghal hle.

Ruahmanna a kal tluan chuan paragliding course hrang hrangah P2 ni turin vawi 5 vel thleng thlawh a ngai a. Samuel-a hian vawiin tlai hian khaw awmdan leh thlir kal dan a zirin a vawi hnihna atan a thlawk chhuak leh ang.

Inrinni zinga Samuel-a a thlawh chhuah dawn hian Chief Instructor chuan kum lama ala naupan em avang leh hlauhthawnna a neih avangte, vansanga a thlawh laia a buai a hlauh vangte in thlawk chhuak thei lo turin thu a lo pe a. Amah kaihruaitu Zaithanmawii hian Chief Instructor hnenah, "Mizo naupang a nia, a buai lo ang," a tih tlat avangin thlawhchhuah tir a ni ta a ni.

A mah kaihruaitu hi Mizoram Paragliding Association a an hruaitu Zaithanmawii a ni a. Ani hian Samuela-a hi hetiang lam zir thei tura a hriat avangin hetianga kaihruai hi a ni. Thudawn danin Samuel-a hian School a luh hma kum 6 mi chauh a nih laiin ft.60 a sang atangin hrui hmangin a uaithla (rapelling) thei tawh a. Kum 8 mi a nihin Mawmrang kham sang lai atangin a uai thla thei tawh bawk a ni.

Tun dinghmunah hian Himachal Pradesh hian Paragliding pilot kum 13 mi an nei mek a, hei hi Samuel-a hian a khum thei dawn niin a lang. Hriat theih chinah India ramah Paragliding Pilot naupang ber nia hriat a ni. Khawvel huap pawhin Glider pilot naupang ber a nih rin a ni.