ZALEN, August 13, 2025: Youth Icon 2024 Lalsangliana (Taitea) leh a fans group zinga mi, Thatea Streaming Club for Taitea chuan Mizo Talent-a telphenglawng tum thiam, Lalrinawma chu Top 30 a tlin lawmpui nan thil pek an hlan.

LPS Vision Production-in kum 2024-a Youth Icon a buatsaiha pakhatna, Bawktlang tlangval leh a fans group hian Nilaini tlai khan Rinawma hi Aizawla a thlenna, Zonuama Kimtea inah an lawmpuizia lantir nan pawisa bakah Taitea Brand T-shirt leh thil dang an hlan a ni.

Taitea chuan Rinawma talent chu ropui a ti a, Mizo Talent first round-a a phenglawng tumin a rilru a hneh thu leh thiam a tih thu a sawi a. Mit lama harsatna nei chunga mipui hmuha a talent pho chhuak tura intihsiak a hmachhawn ngamna chu entawntlak a tih sawiin a kal zelna turah duhsakna a hlan.

Taitea hian amah pawh LPS Vison zara mipui hriat a nih thu Youth Icon intihsiakna lai leh a hnu lam thlengin mipui duhsakna a dawn nasat thu a sawi a. Hei vang hian LPS buatsaih thova tel, Rinawma hnena duhsakna thil pek hlan ve ngei a duh a, a fans group zinga mite nena tangkawpin hma an la ta tih a sawi.

LPS Vision Production buatsaih, Mahindra XUV 3XO Mizo Talent 2025 chuan ngaihhlut a hlawh mek zel a, contestant zingah mi, Nalzawl khua, kum 16 mi, Rinawma’n mit del ni chunga phenglawng a tum thiamna chuan mi rilru a hneh hle.

Mahindra XUV 3XO Mizo Talent 2025 first round intihsiakna hi zawh tawh niin Top 30 intihsiakna chu Ningani zan atangin zan thum chhung neih leh a ni ang.