ZALEN, August, 2025: Mahindra XUV 3XO Mizo Talent Top 30 intihsiakna Inrinni zanah zawh a ni dawn a, zan hnuhnunga inlan tur zingah phenglawng tum thiam Lalrinawma, a ka atanga blade za tel la chhuak thei Lalrama te an tel.

LPS Vision Production buatsaih, Mizo Talent Top 30 intihsiakna hi Ningani zan atang khan tan niin Zirtawpni zan khan magician Gee Guite a che na leh hle a, stage-a a inlan tirin fiamthua tanin judge-te pawhin an hlimpui hle.

Aizawl Breakerz lâm a pui hle a, beatbox thiam Vanlalhlupuia pawh amah tantute beisei ang ngeiin a che pui leh hle bawk.

Top 30 intihsiakna zan hnuhnung chu Inrinni zan dar 08:00-ah tan a ni dawn a, mi 10 an inlan leh tur zingah round hmasaa mipui lawm hlawh leh ngaihven hlawh tak tak an tel.

An zingah Nalzawk rawlthar mitdel, Rinawma a tel a. Magician senior Lalrama pawh a che pui leh hle tura ngaih a ni.

Top 30 intihsiak result hi Thawhtanni zanah LPS 1 atangin puan a ni dan a, mi 30 atanga a ti tha zual 10 thlan an ni ang a, Nilaini zanah intihsiak neih chhunzawm a ni ang.