Mizote hian tawngkam hman dik loh kan nei nual ta mai.Chung zing a langsar thenkhat te hetiang hian lo thai lang ila. A dawt ah tih tur ah a dawh ah tih ching an tam. Dawt hi chu modify loh thin niin a dawt ah tih tur a ni. Tawlh thlu tih tur ah tawlh tlu tih ching an awm. Tlu chu verb niin adverb form chu tlu a ni. Thi adverb from hlum ang chiah hian. Tawlh tlu chu ka vaw thi tih nen a dik loh dan a thu hmun. Nam thlu, tawlh thlu,kit thlu, ti thlu tih zel tur a ni.

A hrim hrim tih leh a hrim hrimah tih hi hmang awm mahse pawn a har. A thu hrimin tih hi a thu hrim ah tih zawk tur a ni. Mai mai tih tur ah mei mei tih chibei tih te Bawlhhlawh ka peih tih te hi a dik lo. Tin ‘e’ hmanna tur ah ‘a’ hmang leh ringawt te an awm bawk. Hna ka thawk peih lo, ka damdawi ei ka ngaih, a vir ngaih hle mai an ti thin te hi a dik lo a ni. In lung tat a par a mi? Tunlai hian em ni tih tur ah a mi an ti ta zel hi chu a pawi khawp mai.

Zawhna kan siamin em ni? tih hram hram tur a ni.Thangthar te zing ah atangin tih tur ah atang tih ching an awm ta nual a dik lo a ni. Khawi atang nge i lo kal? Entirnan Buarpui atangin tih tur a ni.  A zawng zawngin tih hi mi thenkhat chuan an hmang uar tawlh tawlh leh nghal. A vaiin emaw a pumin emaw tih tur a ni.A zawng zawngin tih Standard Mizo a pawm a har. Hmanlai atangin tarmit hi bun lovin an lo vuah daih tawh a ni. Tarmit hi lu ah bun lovin vuah mai tur a ni. Thangthar ho hian sat leh chek hi an hre thiam meuh lo niin a lang. Sam met tih leh lu met tih pawh hi naupang mai ni lo puitling thleng pawh hian kan hre hrang ta meuh lo chu a ni. He kan Mizo tawng ah hi chuan lu met niin tun ah pawh a la dik reng a, met hi tan chhum tihna ni lovin ti fai tihna lam zawk a ni. Nichin tih tur ah nachin tih ching naupang ah leh puitling ah hriat tur a la awm. Nachin a awm lova nichin a awm a, nakin a awm bawk a ni. Mitthi nge kan ral mitthi chhung te tih ah pawh hian ngaih dan in ang lo a awm leh ta nual mai. Tin mi thenkhatin khuaivah, khuaivanrial, khawizu tih an ching hi a dik lo. Mizo tawng kalphung ah chuan thumal hi a mood a dan dawn te zawmtu a awm dawn te hian tih dang lam a tul thin.

Sial pawh se tih tul chang a awm. Se pui, se pa, se no, se la, se ki te kan ti thin. Mizo tawng kalphung dik a ni. Chutiang zelin bal pawh ba tih hun a awm. Bal ka kang tih a dik laiin bal kang kan hmeh tih erawh a dik lo. Ba chu kan hmeh tih tul chang a awm bawk. Khuai  pawh zawmtu a awm dawn chuan khawi tih thin a ni. Khawisanghar, khawipui, khawite khawihnun. Thumal thenkhat chu a sipel dang lam lovin a rik dan a dang thin a ni. Ban pahnih kan nei tih a ban hi ri sei niin mahse banrek tih hi chu a ri tawi thung. Banrek, banpuam tih a ban thluk sei ho hi chu Mizo tawng thiam lo an ni an ti thin.

Vawiin tih mai tur ah vawiin ni tih ching an awm leh ta nual mai. Vawiin ni tih hi tih dik hun a awm. Vawiin ni chu a sa hle mai kan tih chuan Sap tawnga SUN kan sawina a ni. Vawiin ni hi chhinchhiah rawh kan tih chuan DATE kan sawina a ni. Vawiin ni ropui tak ah hian kan tih chuan DAY kan sawina a ni. Heng bak hian hman thin  hun a la awm. Vawiin chauh  ni lo hun kal tawh eng emaw lai atanga vawiin rawn hawlh thleng uar deuh va sawi duhin an hmang thin.  Ka dilba chu ka theh luh atangin thla thum a ni tawh. Vawiin ni thlengin an la ngaihtuah lo. Sawisel ngai lai tak chu vawiin chauh sawi dawn a, vawiin ah hian tih aia vawiin ni ah hian tih thlak zen hi a tul lo a ni. Vawiin zan tih te tun zan tih te hi zanin tih hian a sawi fiahna a, puitling Mizo tawng thiam tan chuan zanin tih mai tur a ni. Zanin tih a zan tih pawh hi lam sei lova, lam tawi mai tur a ni bawk.