Aizawl: Hachhek bialtu MLA Lalrindika Ralte chuan, "Mizo tawng humhalhna kawngah YMA-in nasa lehzuala hma kan lak a ngai a ni," a ti.

He thu hi Thinghlun Branch YMA ten April 7-8, 2022 a Golden Jubilee an lawmna Thinghlun Community Hall-ah khuallian nia thu sawiin Hachhek bialtu MLA Lalrindika Ralte chuan, "YMA hi a hlu a, Mizo hnam kan nihna nemnghet tu chu kan tawng hi a ni a. YMA hi kan hnam anga pawl lian ber leh kan chhuan ber a nih angin tawng humhalhtu atan YMA te hi kan tangkai thei ber bawk a ni," a ti. Mipa ten mipa kan nih anga kan mawhphurhna kan hlen a pawimawh zia sawiin, "Mizo mipate hi kan inngaihtuah chian a ngai hle. A hnam pumpui ang pawha kan inngaihtuah chian a ngai a ni. He hnam himna leh dinchhuahna kawnga mawhphurtu chu mipate hi kan ni a. Mizo mipa kan nih chuan kan mawhphurhna kan hlen tur a ni. Mawhphurhna la ngam lo Mizo mipa kan tam ta lutuk hi inenfiah kan ngai nasa hle a ni," a ti. 

Lalrindika chuan mi rethei zawk te dawmkan a pawimawh zia thu sawiin, "Tuman he ram leh hnam hi min humhalh sak dawn lo. Mahni ram leh hnam dinhmun pawh hre chiang lo kan nih chuan kan dinhmun chu a eng lo viau ang. Mizo hnam te hi rethei zawk te indawm kang a, nei lo zawk te chhawmdawl thin kan ni. Mahse, tunah chuan rethei zawk te dawmkanna lam kan ngaihthah a. Hetianga inhmangaih lo hnam kan nih chuan kan hmabak a eng dawn a, he hnam tana inpe tura kan penchhuah a ngai a ni," a ti bawk.

Thinghlun Branch YMA hi kum 1972, April ni 8 ah din niin tunah hian member 567 an awm mek a ni.