March 25, 2024 : Inrinni kalta (23/3/2024) khan Aizawl West III bialtu MLA VL Zaithanzama chuan kan hma lawka British Army-a lut tur (Assessment nei tur) Mizo tlangval mi parukte a chenna inah zanriah buatsaih sakin he hun hi Malsawmzuala Ralte, MYC Chairman pawhin a hmanpui.

Inspire Agency neitu H.T.Lalruatfeli, Khatla South kaltlanga British Army-a lut tura inbuatsaih mekte hi an vaiin mi 10 an ni a, he agency kaltlang hian March 13 khan Lalmuanzuala Renthlei s/o R.Laltlanchhunga (L), Ramhlun South chu British Army-ah a lutfel tawh nghe nghe a. Tin, Inspire Agency kaltlang hian Mizo tlang panga zet chu Royal Air Force (RAF) -ah an lo tling tawh bawk a, heng Mizo tlangval panga-te hi Mizo zinga Royal Air Force-a tling awmchhunte an la ni rih a ni.

April 30, 2024 hian Mizo thalai mi paruk (6) ten UK-ah British Army-a tang turin assessment an nei a, heng mite hian test chi hnih Beep Test leh Bard Test an paltlang leh a ngai dawn a, Aizawlah test engemawzat paltlang tawhin March thla tawp hian United Kingdom an pan ang. Inspire Agency neitu H.T.Lalruatfeli chuan test chi hnih an hmachhawn leh tur chu thil harsa a ni tawh lova, an vanduai viau a nih loh chuan an tling ngei ang a ti.

May 31, 2024-a assessment nei tur mi pahnih an awm bawk a, heng bakah hian mi engemawzat chu an application process sak mek niin tuna British Army ni tura kohna dawngte hi 2023 May leh June thlaa application thehlut te an ni. June 30, 2024-a assessment nei mi pahnih an awm bawk.

Aizawl West III bialtu MLA VL Zaithanzama chuan British Army-a tang tura kohna dawngte duhsakna a hlan a, India ramah hna a van tawh em avangin sipaia lut tur pawhin tlin a har tawh takzet a, chutihlaia khawvel ram changkang British sipaia tang thei tur Mizo thlalai an la awm belh zel thei chu ropui a tih thu leh mi tam zawkin an zawm belh zel theihna tura sawrkar pawhin hma a lak a duhpui thu a sawi. Pu Malsawmzuala Ralte, Chairman, Mizoram Youth Commission pawhin thu sawiin Mizo thalaiten British Army an luh theihna tur a nih chuan a theih ang anga puih a inhuam thu sawiin sawrkar kum thar lo awm tur atangin nasa zawka hmalak an tum thu a sawi ve bawk.

British Army-a lut tura kohna dawngte

April 30, 2024-a assessment neite)

1. Moses Lalchhuansanga, Khatla South

2. Vanlalhmangaiha Hnamte, Chanmari West

3. Lalramsiama Sawhthlozo, Republic Veng

4. Malsawmkima, Sihphir

5. Rosanga Betlu, Luangmual

May 31, 2024-a assessment neite

1. Steven Vanlalrinawma, Luangmual

2. Lalmalsawma Hnamte, Khatla South

June 30, 2024-a assessment neite

1. Lalhriatpuia, Mualpui

2. Jajesh Khafle, Zonuam