Facebook hi eng ang takin nge hnam changkanghote hian an hman tangkai a, eng ang chiahin nge an hman sual? A nihna leh a tangkai dan kan hriat tak tak hmain, kum reilote chhungin Zoram \halaite min rawn run thut mai a, he ral lo lian hi chak pawh a chakin vahchap kang ang duai duaiin ram a la chak a. Min runtu hian zun a ngah em avangin, a zuna uai fuh tawh laklawh chu tal chhuah a har em em a ni. Amah châka tuihal hian kan dang a ro huam huam a ni ber. A zun ngai \halaiten zan mut nachang kan hre lo va, chhun lamah lah hnathawhna chang kan hre hek lo. Thalaite mai ni lovin kum upa lamah pawh a thawh dan a dang chuang lo, kum sawmli ralkai tawh pawhin kan hmelhriat tawh laklawh chuan talchhuah reng kan tum lo. Computer hmaah nileng zankhuain hun kan hmang a, computer nei loten mobile phone kheuh loh lai kan nei hek lo. Mut hun kan nei lo va, kan mut a chhuah hun hunah, a hun emaw, hun lo emaw kan duh hun hunah kan mu tawp mai a ni. A zun phur zo lo hian Zoram thalaite hi kan buai zo ta a ni ber. Mizo thalaite zingah khawpui a ni emaw, thingtlang a ni emaw, Face Book account nei lo chu tunlai lo riau-ah kan ngai a, Face Book khawih ngai lo nih chu sawichhuah that ngam pawh a ni ta lo. Thingtlang nula leh tlangvalte pawh mobile signal a that tawh em avangin in lam maia online duhtawk lovin, hlo thlawhna leh khawi lo kalna atangtein hun awl kan neih dek dek tawh chuan châng dang kân thei lovin kan phone kan sik nghal mawlh mawlh a. Ram lam atanga chanchinthar a awm leh awm loh kan inhriat hmasiak a, fehna atanga chanchin thar lâm ber han hriatte kha a nih dan tur ve reng emaw kan ti ta. Zoram kilkhawr berah pawh awm ila kan awmna hmun a thil danglam deuh thlengte signal thatna hmun a nih chuan chanchin thar group-ah kan han report a. An han ‘like’ sup sup mai leh an han comment sup sup maite chuan kan rilru a tinuam veng veng a. Phatsan chi rualah kan ruat tawh lo. Zoram parawn leh mi fing leh thiam tak takten an lo hmelhriat hmasak bik loh avangin hnam changkangten eng ang takin nge Face Book hi an hman tangkai tih kan hriat miau loh avangin leh Face Book rallian lo hmachhawn dan kan lo zir lawk miau loh avangin tangkaipui aiin inbawl nan leh fiamthu thawh nan kan hmang nasa a. A tlangpuiin thalaite zingah pawh kum naupang deuhte hi he huang chhunga zuang lut nasa ber pawl kan nih a rinawm. Heng thalai rualte hi kan tam em avangin, khawilai group-ah pawh an awm deuh zel a, mawi leh mawi lo pawh ngaihtuah lovin kan rilrua a thawh dan danin kan langchhuak pawp pawp a. Mahni leh mahniah ber intihna a awm vek avangin kan tana pawi tur nge pawi lo tur pawh kan ngaihtuah hek lo. Face Book huang chhung a nih tawh chuan engkim a leng emaw kan ti a, mawihawih pawh kan dawn hek lo. Mi thiamte leh mi fing tak tak, thuthiam tak takten kan tana tangkai tur eng emaw rawn share sela, a post-tute zah derna pawh nei hauh lovin kan sawisa a, thenkhatte lahin Face Book a nih vangin thu tak hla takah lak an tum hek lo. Face book a nih tawh chuan eng anga group tha, chanchin thar group tangkai tak tak leh group dang tha tak takah te, eng thu mah sawi kan hreh lo va. A tak taka kan tawngkam hman duh miah lohte thlengin hman kan hreh lo va, na tak tak leh tawngkam uchuak tak taka inhnialte lah kan hreh hek lo. Post tha tak leh kan tangkaipui theih tur post te pawh, kan rilrem zawng a nih loh chuan, ho tak takin kan coment luih luih a. Nuiza siam nan leh inkawm khawm nan kan hmang thul. Chutianga post chhuah hotute sawisel zeuh an han awm lahin, kan chuk rawn luih luih a. Tawngkam uchuak tak takin kan run luih a, a sawiseltu nih pawh inchhir awm rum rum khawpin kan tawngkhum a. Eng anga thurawn tha pawh nise mahniah tawk intihna theuh a awm avangin engah mah kan ngai lo va, kan awm dan leh kal dan kan sim phah hek lo. A zun a uai tam berte thalai rual kan nih miau avangin leh eng ang taka hman tangkai theih nge tih kan hriat duh loh avang leh kan ngaihven duh miau loh avangin Facebook rallian hian kan Zoram hi run hum hum mah se, changkan phah nan leh hmasawn phah nan kan tun dinhmunah chuan kan la hmang thiam mawlh lo a ni. Zun ngah em em leh a zun ngaia kur diam diam Zoram thalai tam zawkten, Facebook kan hman dan hi a vei awmin, kan tihdanglama kan kal dan hi kan thlak lo a nih chuan tun atanga kum reilo teah hian Facebook avang hian Zoram thalaite nun hi a dazat em em ang a, sorkar ang pawhin thalaite nun dazat leh chhe lutuk hi kan la buaipui luih luih lo vang tih hi a sawi theih loh. Facebook kan hman danah hian kan hmalam hun hi a thim em em a ni. Chuvangin, khua a tlai hma ngei hian kan mi thiamte an thanharh a, hma an lak hi a van hun em! Ram changkangten Facebook an hman tangkaizia leh an politics nun thlenga Facebook-in a nghawng dante hi a taka inzirtir a hun ta hle mai. Facebook tangkai taka kan hman ve theih nan hian awarness campaign sorkar ang pawhin thlak vat hi kan tih makmawh a ni. Ram changkangah chuan thalai mai ni lo, nu leh pa thlenga Facebook an khawih dan te, a hun leh a hmun an thliar hrang a, a hunah thu tha an sawi a, fiamthu thawhna hmunah fiamthu an thawh a, inzirna hmunah an inzir a, Pathian thu sawina hmunah Pathian thu tha tak tak chhiar turin an lut a. Thil zawrhna hmunah thil lei tur an zawng a, chutiang chuan a hun leh a hmunah engkim an tih dante hi chiang zawka kan inhrilh hriat ngei ngei hi a ngai a ni. Khua a tlai hma leh Facebook hman thiam lohna zunin min ei chhiat hma, kan nun a dazat tak tak hma hian hetiang lama hmala theitute hi han penchhuak mawlh teh se. - Johntea Pachuau