Hmanah chuan Mizo tlangvalte chu khawtlang innghahna, khawtlang dai ngul, sa leh ral laka khawtlang muantu an ni thin.

Tum khat pawh hla phuah thiam, Saikuti te khuaah hian zan khat chu sakei sualin dai a rawn vel a, a rum chur chur mai a. Nunau an thlabar a, tumah pawn chhuak ngam an awm lo. Tlangvalte lahin chet an tum si lo. Saikuti mangang chu zah dawn loin Zawlbukah a han kal a, “Rum chur churin sakawlin dai a vel. Tho rawh u le, hran tum val zawng chu,” a han ti a. Chu veleh Zawlbuk khata awm tlangval za rual zet mai chu khawinghal bu tawn darh ang maiin an darh ta huk mai a, an tho suau a, sakei sual chu an hnawt bo ta thuai mai a ni.

Tun lai hian Mizo tlangvalte hi ram leh khawtlang innghahna, khawtlang muantu kan la ni zel em le? Ngaihtuah tham tak a ni. Zirnaah te, eizawnna kawng hrang hrangah te, sumdawnnah te hian hmeichhiate hi a hmahruai, a sulsutu an ni ta fur mai. Mizo mipa kan thang tlawm sawt ta hle mai.

August 2, Zirtawpni khan Serchhip College zirlai, NSS volunteer-te chuan a mamawh apiangte hman turin thisen an pe a. Thisen petute hi hospital-a thawkten college-ah an kalchilh a. Thil mak deuh mai chu thisen petu mi 70-ah a zahve aia tam mi 41 chu hmeichhia zuk nia maw le! Pek tuma hming pe lut, blood bank lama dahna turin a daih tak loh vanga pe thei ta lo zingah pawh hmeichhia an la tam zawk cheu mai. Thla tin khel loa thi nei thin hmeichhia pawh mipate hian kan tluk ta mang lo chu a ni e.

Office-ah han kal ila, hmeichhia an lo thu nghuk a, bazarah nise an lo tlim leh hmur mai bawk a. Khawnge Mizo mipate an awm tak? Chhungkaw ei bel, chhungkaw innghahna, chhungkaw khaidingtu hmeichhia an va tam ta em! Nakin lawkah chuan kan hmeichhiate hi ei zawngin an vak chhuak suau suau ang a, mipate hian in kan lo nghak ang a, chu chu kan tih theih sang ber a la ni mai ang tih hlauhawm tak a ni ta.

Zirna lamah nise, a hmahruaiah hmeichhia an lang ta zat zat mai. Kumin 2019-a Mizoram University hnuaia degree course exam-a subject hrang hranga topper-te kha hmeichhia vek zuk nia maw le! State Civil service exam-ah pawh hmeichhia an lang indawt ta zut mai. IAS exam-a tling hnuhnung ber pawh hmeichhia bawk.

Mizo mipain hma kan hruai vena chu ruihhlo ngawlveiah te, zu inah te, mahni intihhlumah te, thih tamah te a ni. Tun kum hnih khat lek chhung hian ruihhlo vangin Mizo mipa, pavalai leh tlangval kan va chân hnem em! Chhungkaw chawm chu sawi loh, chhungkaw titlarantu, tikawnkawtu, nu leh pate phurrit Mizo tlangval kan va tam ta em!

Kan hman hi hnam zahawm kan lo nih a, mahni kea ding thei kan nih dawn chuan mipate hian kan tih tur kan tih a, chhungkua leh khawtlanga kan mawhphurhna kan hlen ve a ngai. Ram leh khawtlang tana mi chhenfakawm, chhungkaw innghahna tlak Mizo tlangval kan ni leh dawn lo’m ni? Chumi tur chuan kan puan ven kan sawi chhing leh dawn lo’m ni?