Aizawl April 27, 2024 : MPYCC chuan thuchhuah siamin Mizo tleirawl, inbumna hmanga Dubai, United Arab Emirates-a Housemaid tura sawrkara kuma kum tling lo, Agency-in Passport dik lo leh Immigration License Legal Documents nei lova thawn an nih hnuah thla 7 teh meuh Jail-a tantir an nih chu lungchhiat thlak hriat tur a awm chu pawi an tiin lungchhiat thlak an ti.

MPYCC chuan, "He thilthleng chungchangah hian 2023 khan FIR thehluh a ni a, Sepetember 9, 2023 khan FIR register a ni. Mahse sawrkar atanga hmalakna a awm zui loh avangin Febuary 12, 2024 khan Petroleum Geologist Lalchhuanzela chuan Home Minister K. Sapdanga hnenah hma la tura ngenna a thlen leh a. Phone hmangin Adviser to Chief Minister Dr. KC Lalmalsawmzauva pawh biak niin CM adviser hian Chief Minister pawh a hrilh. Guwahati Mizo Welfare pawhin hmaichhanah Chief Minister Lalduhoma chu hmalak sak turin an ngen bawk. Lalchhuanzela hian a biak theih leh hmala thei tura a ngaih be kualin ZPM-a hotu, Serlui biala ding tura ngaih Jimmy Laltlanmawia te hnenah WhatsAp leh Facebook Messenger hmangin hrilh a ni," an ti.

Congress thalai chuan. "Hetiang khawpa ngenna tam tak thlen a ni chunga hmalakna awm miah lo hi ZPM hi ram rorelna chelh tlakah a ngai loa. Chief Minister Lalduhoma berin Agency te thil tih chu dan lo a ni tih hre reng a, Licence an nei lo tih a hre bawk chunga a ngai pawimawh lo lutuk leh Assembly House-ah pawh thil sual titute hum zawnga thu a sawi duh hian ram mipuite himna a ngaih pawimawh loh zia a tichiang hle a. Harsatna tawkte chhungkua mai bakah Mizoram mipui rilru a ti na takzet a ni," a ti.

He buaina chungchang hian MPYCC chuan, "Kan unaute harsatna tawh chungchangah hian Mizo tlangval, kum 2018-a Mizoram Youth Commission buatsaih 'Young Achiever’s Award-2018', Amazing Mizo Award 2018 leh SSU Award 2018 dawng tawh North Chawnpui tlangval Lalchhuanzela, Petroleum Geologist Consultant Dubai chuan a hna leh a hun mai bakah pawisa tam tak senga a lo buaipui hi lawmawm a tiin a chhuang a, tleirawl harsatna tawk te him taka an chhungte nena an inhmu leh thei hi lawmpuiin an hmalam hun kal zel turah duhsakna a hlan a ni," an ti.