A thupui kan han chhiar atang ringawt pawh hian chindan tha lo pui pui: thiltih honaa a hun pangngai aia tlai te,sawi ringawt phura a tak ram thlen ngam loh te,thatchhiatna,dawngdahna leh thil thalo tinreng kan rilruah a lo lang nghal zut zut awm e.Hnam thatchhia nihna te,hnam dawngdah leh dawihzep nihna te,nihna chhe pui puite hi hnamdangte'n min pek leh bel a ni lo a,keimahni Mizo te ngeiin kan inpek a ni.Mi tam tak (ka ram hruaitute hial paw'n)te'n an thusawinaah hetiang hian kan hnam chungah hian mi hnam chunga an puh ngamloh hi an puh nasa em em mai a ni. 'Mipui an thuhmun thei lo’ tih ang bawkin hnam tin zingah hian mi dik tak tak, huaisen tak tak leh mitha pui pui an awm theuh a,chutih rual chuan mi dawihzep, hlemhle, depde leh rinawm loh tak takte pawh hnam tin hian kan nei theuh a ni. Eng hnam mah hi a hnam ang azawnga dawihzep te, huaisen bikte, dik bikte, rinawm bikte an awm lo a ni. Hnam thenkhat zingah mi rinawm tak tak an thathnem deuh avangin an hnam kha hnam rinawm an nih phah lo a,kan mite zingah mi duham,thatchhia leh rinawm lo an thathnem deuh avangin Mizo-te hi hnam duham, thatchhia leh rinawm lo kan nih phah kher lo. Kan biak Pathian nung hian thil tha chauh a siam lo a, engkim siamtu, thim a siam ruala eng siamtu a ni tih hi hriat nawn fo a tha hle awm e. Khawvel hnam hrang hrang leh kan chhehvela hnam hrang hrang te nena kan intehkhin paw'n Mizo-te hi kan thahnem lo bik em em a, min hual veltu hnam hrang hrangte chu hnam lian pui pui an ni a, kan thathnem loh bik avang hian kan tihsual a langsar hma bik a, hnam lian zingah chuan hliahkhuhtu an thahnem a, an tihsual a langsar harin keini angin anmahni leh mahni an insawichhiain, hnam dang chunga an puttir ngam loh hi an hnam chungah an puttir ngai lo bawk. Kan hriat angin kan pi leh pute atang tawha hna thawk nasa,thenawn pa’n hak a chham pawha mahni thiam loh a ngaia lo inthiam lo ngawih ngawih thin khawpa taima leh mi hmangaihna nei kan ni a, chutih rual chuan thatchhe em em mai Samdala te, mahni tana hlawkna pawh awm si lo a Mi chhiatna pawh pawisa hauh lo Chawngfianga palaite pawh an awm tih kan hriat kha,a chhan chu Pathian hian engkim a siam tlat alawm. Ze tha lo leh tih dan tha lo apiang kan hnam zia leh tih dana kan puh zel hi a tha loa,he thil hi kan sim vat a tul a,kan tawngka mah pawh kan fimkhur a ngai a ni. Puitling zawkte leh vantlang hmaa thusawi thinte pawh hian an fimkhur a ngai a, hetiang ngaihdan hi an neih tlat chuan naupang leh thangtharte rilruah chi tha lo an tuh a,kan hnam zia ni lo pui kha kan hnam zia emaw tiin hnam dangten min hmuhsit bakah kan hnam boralna leh chhiatna thlentu,a hnam anga chhiatrupna leh mualphona thlen theitu a ni. Tunah chuan kan Mizoramah hian Mizo hlang kan awm tawh lo a,hnam hrang hrang kan inpawlh tawh a, heng hnamte hian keimahni tlukin kan tawng (Mizo tawng) an thiam a, kan thusawi engkim hi an hrethiam ve vek si a,chuvang tal pawh chuan kan tawngkam hi kan fimkhur a ngai em em a, kan chhungkuaah mi dang an awm a,midang hriata kan chhiatna kan sawi zuah zuah a,thilchhe tinreng kan chhungkaw chunga keimahni leh keimahni kan inbel chuan heng hnam te hian min hmuhsit phah bakah pawn lama min sawi dan tur phei chu a chiang nghal reng mai a. Tin, heng hnam dangte hi politics leh a hnam ang zawng pawha min hmelmaktute an ni a,kan politician te politics khelh dan a fuh loh avangin chhungkaw hlangin kan awm thei si loa, mi dang an awm ve reng avangin kan fimkhur a ngai em em a ni. Mizo-te hi a tlangpuiin thuawihthei tak kan ni a,kan taimain kan huaisen hle bawk a,mi thenkhatte avanga kan hnam a hmel balh hi phal lo ila,kan finna,thuawihtheihna leh inthununtheihnate kha hrerengin fimkhur takin awm ila,a chhia zawng zawng hi 'Mizo zia' tiin i inbel tawh lo ang u. MIZO KAN NIH KHA. — Jerusalem Lalramnghaka