A thupui kan chhiar atang ringawt pawh hian chin dan tha lo pui pui: thiltihhonaa a hun pangngai aia tlai te, sawi ringawt phura a tak ram thlen ngam loh te, thatchhiatna, dawngdahna leh thil tha lo tinreng kan rilruah a lo lang nghal zut zut awm e. Hnam thatchhia nihna te, hnam dawngdah leh dawihzep nihna te, nihna chhe pui puite hi hnam dangten min pek leh belh a ni lo a, keimahni Mizote ngeiin kan inpek a ni. Mi tam tak (kan ram hruaitute hial paw’n) ten an thusawinaah hetiang hian kan hnam chungah hian mi hnam chunga an puh ngam loh hi an puh nasa em em mai a ni. ‘Mipui an thuhmun thei lo’ tih angin hnam tinah hian mi dik tak tak, huaisen tak tak leh mi tha pui pui an awm teuh a, chutih rualin mi dawihzep, hlemhle, depde leh rinawm lo tak takte pawh hnam tin hian kan nei theuh a ni. Eng hnam mah hi a hnam ang a zawnga dawihzep te, huaisen bik te, dik bik te, rinawm bikte an awm lo a ni. Hnam thenkhat zingah mi rinawm tak tak an thathnem deuh avangin an hnam kha hnam rinawm an nih phah lo a, kan mite zingah mi duham, thatchhia leh rinawm lo an thathnem deuh avangin Mizote hi hnam duham, thatchhia leh rinawm lo kan nih phah kherloh. Kan biak Pathian nung hian thil tha chauh a siam lo a, engkim siamtu, thim a siam ruala eng siamtu a ni tih hi hriat nawn fo a tha hle awm e. Khawvel hnam hrang hrang leh kan chhehvela hnam hrang hrangte nena kan intehkhin pawhin Mizote hi kan thahnem lo bik em em a, min hual veltu hnam hrang hrangte chu hnam lian pui pui an ni a, kan thathnem loh bik avang hian kan tihsual a langsar hma bik a, hnam lian zingah chuan hliah khuhtu an thahnem a, an tihsual a langsar harin keini angin anmahni leh mahni an insawichhiain, hnam dang chunga an puttir ngam loh hi an hnam chungah an puttir ngailo bawk. Kan hriat angin kan pi leh pute atang tawha hna thawk nasa, thenawm painn hak a chham pawha mahni thiam loh a ngaia lo inthiam loh ngawih ngawih thin khawpa taima leh mi hmangaihna nei kan ni a, chutih rual chuan thatchhe em em mai Samdala te, mahni tana hlawkna pawh awm si loa mi chhiatna pawh pawisa hauh lo, Chawngfianga palaite pawh an awm tih kan hriat kha, a chhan chu Pathian hian engkim a siam tlat alawm. Ze tha lo leh tih dan tha lo apiang kan hnam zia leh tih dana kan puh zel hi a tha lo a, kan sim vat a tul a, kan tawngkamah pawh kan fimkhur a ngai a ni. Puitling zawkte leh vantlang hmaa thusawi thinte pawh hian an fimkhur a ngai a, hetiang ngaihdan hi an neih tlat chuan naupang leh thangtharte rilruah chi tha lo an tuh a, kan hnam zia ni lo pui kha kan hnam zia emaw tiin hnam dangten min hmuhsit bakah kan hnam boralna leh chhiatna thlentu, a hnam anga chhiatrupna leh mualphona thlen theitu a ni. Mizoramah hian Mizo hlang kan awm tawh lo a, hnam hrang hrang kan inpawlh tawh a, heng hnamte hian keimahni tlukin kan tawng an thiam a, kan thusawi engkim hi an hrethiam ve vek si a, chuvang tal pawh chuan kan tawngkam hi kan fimkhur a ngai em em a, kan chhungkuaah mi dang an awm a, mi dang hriata kan chhiatna kan sawi zuah zuah a, thil chhe tinreng kan chhungkaw chunga kan inbel chuan heng hnamte hian min hmuhsit phah bakah pawn lama min sawi dan tur phei chu a chiang reng mai a. Heng hnam dangte hi politics leh a hnam zawng pawha min hmelmaktute an ni a, kan politician te politics khelh dan a fuh loh avangin chhungkaw hlangin kan awm thei si lo a, mi dang an awm ve reng avangin kan fimkhur a ngai a ni. Mizote hi a tlangpuiin thuawih thei tak kan ni a, kan taimain kan huaisen bawk a, mi thenkhatte avanga kan hnam a hmel balh hi phal lo ila, kan finna, thuawihtheihna leh inthunun theihnate kha hrerengin fimkhur takin awm ila, a chhia zawng zawng hi 'Mizo zia' tiin i inbel tawh lo ang u. MIZO KAN NIH KHA.